Tags-Khwab

'hassan' rātoñ ko jab sab log mīThī niind sote haiñ
to ik ḳhvāb-āshnā chehra hameñ bedār kartā hai

jalsoñ meñ ḳhalvatoñ meñ ḳhayāloñ meñ ḳhvāb meñ
pahuñchī kahāñ kahāñ nigah-e-intizār aaj

aap ne aañkh meñ jo ḳhvāb sajā rakkhe haiñ
un ko ta.abīr mirā dast-e-hinā.ī degā

palkoñ pe apnī ḳhvāb-e-tajallī sajā.iye
shaam aa.ī hai to raat kā lashkar bhī aa.egā

aañkh khultī hai to sab ḳhvāb bikhar jaate haiñ
sochtā huuñ ki bichhā duuñ koī jaal aise meñ

uge haiñ ḳhvāb-zāroñ meñ manāzir sar-tarāshī ke
suhānī vādiyoñ meñ bāvle lashkar nikal aa.e

Dagmagātī huī har-gām sambhaltī huī shaam
ḳhvāb-gāhoñ se udhar ḳhvāb meñ chaltī huī shaam

zakāt-e-ḳhvāb meñ de dī haiñ maiñ ne āñkheñ bhī
ab ai jahān-e-digar hīta-e-nazar se nikal

nigāh-e-zard meñ ug sabz ḳhvāb kī koñpal
gulāb-e-shāḳh phir ujḌe hue shajar se nikal

siyāh raat sitāre bujhātī rahtī hai
ye merā ḳhvāb-sitāra kahāñ nikaltā hai

āñkheñ chamak uThī haiñ jo raushan ḳhayāl se
dīvāngī ke ḳhvāb se aage chale ga.e

merī uñglī par haiñ ab tak mere dāñtoñ ke nishāñ
ḳhvāb hī lagtā hai phir bhī jis jagah baiThā thā maiñ

dhuñdle dhuñdle se sitāre haiñ ufuq par larzāñ
zindagānī ke hasīñ ḳhvāb haiñ mub.ham kitne

rāt-bhar ḳhvāb meñ jalnā bhī ik bīmārī hai
ishq kī aag se bachne meñ samajhdārī hai

be-ḳhvāb kar rahe haiñ shab-e-ġham ke marhale
āñkheñ jhapak na jaa.eñ tulū-e-sahar ke ba.ad

tuyūr the jo ghoñsloñ meñ paikaroñ ke uḌ ga.e
akele rah ga.e haiñ apne ḳhvāb ke makāñ meñ ham

vo ā.eñge nahīñ aa.e ḳhat aa.egā nahīñ aayā
ġhalat niklī mirī tābīr-e-ḳhvāb avval se āḳhir tak

terī āñkhoñ se milī jumbish mirī tahrīr ko
kar diyā maiñ ne mukammal ḳhvāb kī ta.abīr ko

ulfat ko miTāne ke dar pe duniyā aur maiñ is soch meñ huuñ
ulfat na rahegī jab baaqī ḳhvāb-e-dil-e-insāñ kyā hogā

ta.abīroñ se band qabā-e-ḳhvāb khule
mujh par mere mustaqbil ke baab khule