Tags-Khwab

nahīñ khultīñ āñkheñ tumhārī Tak ki ma.aal par bhī nazar karo
ye jo vahm kī sī numūd hai use ḳhuub dekho to ḳhvāb hai

ik charāġh-e-dil bachā thā aur sannāTe kī shab
zau-fishāñ tāroñ kī maddham ḳhvāb-afshānī ga.ī

kuchh log dil kī aaḌ meñ rū-posh ho ga.e
āñkhoñ meñ ḳhvāb aa.e to ḳhāmosh ho ga.e

ā.īna-e-nigāh meñ aks-e-shabāb hai
duniyā samajh rahī hai ki āñkhoñ meñ ḳhvāb hai

ik ḳhvāb ḳhazāna nīñdoñ kā vo ham sab ne barbād kiyā
ik niiñd ḳharāba ḳhvāboñ kā aur ham sab us meñ rahte haiñ

tere pairāhan-e-rañgīñ kī junūñ-ḳhez mahak
ḳhvāb ban ban ke mire zehn meñ lahrātī hai

chaman luTā hai ḳhud ahl-e-chaman kī sāzish se
kalī kalī hai magar mahv-e-ḳhvāb sī phir bhī

maanā vo ek ḳhvāb thā dhokā nazar kā thā
us bevafā se rabt magar umr-bhar kā thā

vo tire qurb kī ḳhushbū ko ayaañ ho na nihāñ
vo haqīqat bhī nazar aatī hai ik ḳhvāb mujhe

maiñ to sadiyoñ kā nindāsā huuñ magar ye to batāo
kyuuñ ye māhaul nazar aatā hai be-ḳhvāb mujhe

isti.āra huuñ na.e ahd meñ gum-shudagī kā
bhūlte jaate haiñ maazī ke hasīñ ḳhvāb mujhe

shab un kī hai jo terā ḳhvāb dekheñ aur din un kā
jo baiThe yaad tujh ko sub.h se tā-shām karte haiñ

havā kī zad meñ hai har chiiz ḳhār-o-ḳhas kī tarah
kaho paḌe raheñ chup-chāp ḳhvāb apnī jagah

ḳhvāb-dar-ḳhvāb mirā phūloñ kī vaadī kā safar
aañkh khul jaa.e to ik dasht-e-balā hai mujh meñ

ham aise aise zamānoñ se ho ke aa.e haiñ
ki ḳhvāb vāloñ ko ḳhvāboñ se ik gila rahegā

titliyāñ jugnū shajar ḳhushbū parinde chhoḌ kar
hañs rahī huuñ ḳhvāb saare maiñ adhūre chhoḌ kar

chāñd-tāroñ kā tire rū-ba-rū sajda karnā
ḳhvāb dekhā hai to kyā ḳhvāb kā charchā karnā

kuchh dard jagā.e rakhte haiñ kuchh ḳhvāb sajā.e rakhte haiñ
is dil ke sahāre jīvan meñ ham baat banā.e rakhte haiñ

yuuñ nahīñ hai ki har ik ḳhvāb ko ta.abīr mile
aisā kab hai jise chāho use pā sakte ho

koī mumtāz hai aur na shāh-e-jahāñ soz aur saaz hai kuchh alag hī yahāñ
tāj-mahaloñ ke vo ḳhvāb dekhegā kyā sañg-e-marmar kā zaanū jise yaad hai