Tags-Khwab

shikasta ḳhvāb ke reze zamīn-e-vahshat se
barahnagī kī qabā oḌh kar nikal aa.e

vo pahlī kiran sī mire āñsuoñ kī
mujhe apnā ik ḳhvāb yaad aa rahā thā

gul-afshāñ jo zamīñ thī vo zamīñ ab aag ugaltī hai
ajab ta.abīr dekhī hurriyat ke ḳhvāb kī maiñ ne

mujhe is ḳhvāb ne ik arse tak be-tāb rakkhā hai
ik ūñchī chhat hai aur chhat par koī mahtāb rakkhā hai

maiñ kho gayā huuñ tire ḳhvāb ke ta.āqub meñ
bas ek jism mirā āḳhirī havāla hai

ābgīnoñ kī tarah TuuT gayā TuuT gayā
ḳhvāb-e-yūsuf meñ zuleḳhā kā bharam aap hī aap

ḳhvāb thā yā shabāb thā merā
do savāloñ kā ik javāb huuñ maiñ

phir na.ī hijrat koī darpesh hai
ḳhvāb meñ ghar dekhnā achchhā nahīñ

niind ujḌī to nigāhoñ meñ manāzir kyā haiñ
ham ki betāb kisī ḳhvāb kī ḳhātir kyā haiñ

har taraf se mujhe kyā ghuur rahī haiñ āñkheñ
ḳhvāb huuñ dīda-e-bedār meñ kyūñkar aa.uuñ

tum ālam-e-ḳhvāb ke baaz ashhab
kibriyat-e-ahmar nāyāb

vo vaqt kabhī to aa.egā jab dil ke chaman lahrā.eñge
mar jā.ūñ to kyā marne se mire ye ḳhvāb nahīñ mar jā.eñge

ġharq honā na kahīñ ḳhvāb-e-farāmoshī meñ
muñh añdhere hī tumheñ 'rāhī' agar jaanā hai

pyaar gayā to kaise milte rañg se rañg aur ḳhvāb se ḳhvāb
ek mukammal ghar ke andar har tasvīr adhūrī thī

ḳhvāb kā darvāza kui masdūd kar detā hai roz
paḌte haiñ rātoñ ko yaañ aise hī patthar ḳhvāb meñ

hai ġhaib-e-ġhaib jis ko samajhte haiñ ham shuhūd
haiñ ḳhvāb meñ hunūz jo jaage haiñ ḳhvāb meñ

dekho mirī aañkh bujh rahī hai
dekho mire ḳhvāb jal rahe haiñ

āñkheñ jo liye phirtā huuñ ai ḳhvāb-e-musalsal!
mere liye ye kār-e-aziyyat bhī bahut hai

maiñ tirī baat karā detā huuñ ḳhud se lekin
aañkh kahtī hai kisī ḳhvāb meñ rahnā hī nahīñ

ek hī ḳhvāb to maiñ ne dekhā thā yaaro
ḳhvāb koī sadiyoñ tak chaltā rahtā hai