Tags-Lab

shaam khultī hai tere aane se
lab pe terā savāl rakhtī hai

ye kyā ki aaj koī naam tak nahīñ letā
vo din bhī the ki har ik lab pe baat apnī thī

bedārī-e-vajūd hai ḳhvāb-e-adam meñ ġharq
lab band ho ga.e yahī shor-e-nushūr hai

na rahā 'mushīr' hī tishna-lab sar-e-bazm sāqī-e-be-ḳhabar
koī bāda-kash nahīñ mutma.in tire mai-kade ke nizām se

aa.egī apne lab pe to hogī parā.ī baat
lāzim hai rāz-e-dil kabhī ifshā kiyā na jaa.e

shiddat-e-iz.hār-e-mazmūñ se hai ghabrā.ī huī
terī be-unvāñ kahānī lab pe sharmā.ī huī

dil ke asrār chhupāte haiñ vo ham se 'shā.ir'
ham ki rañg-e-lab-o-ruḳhsār samajh lete haiñ

allāh salāmat rakhe tere lab-e-shīrīñ
sunvāyā kare bāteñ mazedār hamesha

dil pe sadme liye jaur-o-sitam ḳhūbāñ ke
zabt dekho na kabhī vā lab-e-fariyād kiyā

tishnagī bebasī lab-e-dariyā
merī pahchān hī vahāñ se huī

har chand thā nashe meñ vo shoḳh to bhī us ne
hargiz hamāre lab ko aane diyā na lab tak

terī zulfeñ tirī āñkheñ tire abrū tire lab
ab bhī mash.hūr haiñ duniyā meñ misāloñ kī tarah

lab pe har-vaqt fuġhāñ ho ye zarūrī to nahīñ
ham-navā dil kī zabāñ ho ye zarūrī to nahīñ

āftāb-e-lab-e-bām ab to hue haiñ 'kaifī'
āñkheñ phir us se laḌā.eñ bhalā kyā koThe par

mizha se qatra ḳhushī meñ chhalak rahā thā magar
sukūt-e-lab se tire mauj-e-iztirāb banā

barg-e-sadā ko lab se uḌe der ho ga.ī
ham ko bhī ab to ḳhaak hue der ho ga.ī

tujh se ai bulbul ziyāda gul meñ hai tāsīr-e-ishq
dil meñ ḳhuuñ lab par hañsī hai us ke pairāhan meñ aag

lab-hā-e-yār ne to gulistāñ piro liye
ḳhushbū jo pā rahe haiñ tirī pañkhuḌī se ham

ubhregā tere lab se kabhī harf-e-dostī
dil meñ is intizār kī hasrat liye phirūñ

tire chashm o lab kī shabāhateñ mujhe roz o shab mileñ baaġh meñ
kahīñ titliyoñ pe likhī huī kahīñ jugnuoñ meñ bharī huī