Tags-Lab

un ke lab par hai jo halke se tabassum kī jhalak
us meñ apne āñsuoñ kā soz bhī paatā huuñ maiñ

vo dard ko chintā thā palkoñ se sitāroñ ko
naġhmoñ meñ badaltā hai ehsās ke lab chhū ke

lab-basta bastiyoñ kā phir anjām ye huā
sab kā luTā qarār yake-ba.ad-dīgre

kisī Thahrī huī saa.at kī tarah mohr-ba-lab
mujh se dekhī nahīñ jaatī ye aziyyat us kī

jis din mirī ġhazal ne chhue us ke lab 'bashīr'
us din mirī ġhazal kā safar mo'atabar huā

shor-e-tahsīn-e-suḳhan kī rau bahāne aa.ī thī
zeb-e-lab 'mānī' ke man aanam ki man dānam huā

aaj 'tabassum' sab ke lab par
afsāne haiñ mere tere

ḳhāmosh haiñ lab aur āñkhoñ se aañsū haiñ ki paiham bahte haiñ
ham sāmne un ke baiThe haiñ aur qissa-e-furqat kahte haiñ

vā nahīñ hotā lab-e-shikva sar-e-mahshar 'ra.īs'
apne sar par ḳhanjar-e-qātil kā ehsāñ dekh kar

duā lab-e-jām ne bhī māñgī subū ne bhī haath uThā uThā kar
hamārī mahfil meñ aayā saaqī ḳhudā ḳhudā kar ḳhudā ḳhudā kar

donoñ bahr-e-shola-e-zāt donoñ asīr-e-anā
dariyā ke lab par paanī dasht ke lab par pyaas

sāhil ke lab se pūchho dariyā ke dil se pūchho
ik mauj-e-tah-nashīñ kā muddat ke baad ubharnā

ishq bhī mohr-ba-lab guzrā hai duniyā kī kyā jur.at thī
us kī nīchī nazroñ meñ bhī aisā saḳht ġhurūr rahā

tishna-lab baiThe haiñ mai-ḳhāna-e-hastī meñ 'sahar'
dil vo TuuTā huā paimāna ki bhar bhī na sake

dil se lab tak koī kohrām sā sannāTā hai
ḳhud-kalāmī mujhe le aa.ī kahāñ ham-nafaso

dil meñ jo kuchh thā un se kah na sakā
lab pe aa aa ke rah gayā matlab

jiite haiñ to hotī hai un āñkhoñ se nadāmat
marte haiñ to us lab se ijāzat nahīñ miltī