Tags-Lab

aañkh se qatl kare lab se jalā.e murde
sho.abada-bāz kā adnā sā karishma dekho

phir lahū Tapke hai pyāre aaj kuchh bātoñ ke biich
sach kaho lab se tumhāre rañg-e-pān ne kyā kahā

jo sham.a-rū ke do lab haiñ shīrīñ to sabza-e-ḳhat bajā hai us par
zamīn pakḌī hai tūtiyoñ ne sunīñ jo mīThī piyā kī batiyāñ

alfāz guftugū ke liye ab nahīñ rahe
mahsūs ho rahā hai mire lab nahīñ rahe

maiñ tishna-lab huuñ sar-e-dasht-e-āgahī kab se
sabīl tū hai to sahrā-e-justujū meñ aa

tishna-lab kyuuñ rahe ai sāqī-e-kausar 'chandā'
ye tire jām-e-mohabbat ko piye baiThī hai

zor hai jaise ki nisbat namak o riish ke biich
maiñ hī samjhūñ tirī kaifiyyat-e-lab kā ahvāl

marg-e-aġhyār lab pe lā na sakā
vo qasam huuñ jo yaar khā na sakā

dil kī dhaḌkan baḌhtī jaa.e sun sun kar
shīshagar ke lab par bāteñ patthar kī

lab talak bhī aa nahīñ sakte haiñ maare zo.af ke
aah fauj-e-ġham ke jo jaane havaldāroñ meñ the

ai gulābī mast phir muñh lag ke us ke is qadar
la.al-e-lab ke ek din ham bhī parastāroñ meñ the

ashk nigal jā.ūñ to yaqīnan shiddat-e-ġham ho jaa.e kam
dil kā jhulas jaanā lāzim hai aah jo lab par aa.e kam

kalī kalī lab-e-goyā shajar shajar ḳhāmosh
ye dāstān hai kis kī bayān kis kā hai

apnī apnī aag meñ āñkheñ jhulas kar rah ga.iiñ
tere lab ke phuul terā bāñkpan dekhegā kaun

kyā kāsa-e-mai lījiye is bazm meñ ai ham-nashīñ
daur-e-falak se kyā ḳhabar pahuñchegā lab tak yā nahīñ

maiñ fan kī sā.atoñ ko lab na de sakā
nuqūsh be-zabān ban ke rah ga.e

ik jū-e-be-qarār ho kyuuñ dil-kashī tirī
kyuuñ itnī tishna-lab mirī āñkhoñ kī pyaas ho

khul gayā uqda-e-hastī-o-adam misl-e-habāb
lab-e-dariyā pe huā jab ki guzārā apnā