Tags-Lab

hamāre haath meñ jab koī jaam aayā hai
to lab pe kitne hī pyāsoñ kā naam aayā hai

in āñkhoñ meñ ka.ī sapne ka.ī armān the lekin
sukūt-e-lab kī tah meñ kis qadar tūfān the lekin

shā.irī ke liye lāzim hai talāzum na chhuTe
la.al lab ko tire tū dāñtoñ ko gauhar bāñdhe

mo.ajiza lab tirā goyā kare ai rashk-e-kalīm
jo zabāñ sehr se ye chashm-e-fusūñ-gar bāñdhe

baat se baat nikalne ke vasīle na rahe
lab rasīle na rahe nain nashīle na rahe

dekh lī saaqī kī bhī dariyā-dilī
lab na hamāre kabhū tar kar gayā

ḳhushā ki aaj har ik mudda.ī ke lab par hai
vo raaz jis ne hameñ rāñda-e-zamāna kiyā

jumbish-e-lab se mire daar pe sar aate haiñ
phir bhī kuchh raaz fazāoñ meñ khulā hai to sahī

tire paas aa ke bhī jaane kyuuñ mirī tishnagī meñ hirās thā
ba-misāl-e-chashm-e-ġhazāl jo lab-e-ābjū bhī Darī rahī

na dil se aah na lab se sadā nikaltī hai
magar ye baat baḌī duur jā nikaltī hai

yaar ik lazzat-e-dīdār se aage na ga.e
ya.anī zulf-o-lab-o-ruḳhsār se aage na ga.e

lab tire pañkhuḌī se milte haiñ
bol ik rāgnī se milte haiñ

maiñ bhī izn-e-navā-garī chāhūñ
be-dilī bhī to lab hilātī hai

sab ne rasmī hī hañsī lab pe sajā rakkhī hai
har koī dard meñ Duubā hai ḳhudā ḳhair kare

ab aksar chup chup se raheñ haiñ yūñhī kabhū lab kholeñ haiñ
pahle 'firāq' ko dekhā hotā ab to bahut kam boleñ haiñ

lo dekho 'hamīdī' lab-e-dariyā pe hai dariyā
par pyaas hai kab kī ye patā kyuuñ nahīñ karte

ham to samjhe the sukūñ pā.eñge be-hoshī ke ba.ad
hosh jab aayā to phir lab par tirā naam aa gayā

vo fitna-e-mahshar hai magar mohr-ba-lab hai
jaise ho koī mom kī guḌiyā mire aage

matlūb-e-duā haq meñ nahīñ apne kisū kī
tālib lab-e-mahbūb se dushnām kā huuñ maiñ