Tags-Musafir

haañ yahī naam thā kuchh aisā hī chehrā-mohrā
yaad paḌtā hai ki aayā thā musāfir koī

ye sarā.e hai yahāñ kis kā Thikānā DhūñDo
yaañ to aate haiñ musāfir so chale jaate haiñ

maiñ to ik mustaqil musāfir huuñ
tū bhalā merā ham-safar kyuuñ hai

sukūt-e-shab meñ jab saare musāfir so.e hote haiñ
unhīñ lamhāt meñ kashtī nadī se baat kartī hai

milā thā hijr ke raste meñ sub.h kī mānind
bichhaḌ gayā thā musāfir se raat hone tak

ravāñ hai umr aur insān ġhāfil
musāfir hai ki sotā jā rahā hai

kuuch kī saa.at aa ga.ī sar par 'shād' uThā le jholī-bistar
niiñd meñ saarī raat basar kī chauñk musāfir raat nahīñ hai

bhuul na us ko dhun hai jidhar kī chauñk musāfir raat nahīñ hai
shakl numāyāñ hogī sahar kī chauñk musāfir raat nahīñ hai

pañkh-pakherū ḳhvāb se chauñke sab ne ḳhushī ke na.are maare
aa.ī sadā murġhān-e-sahar kī chauñk musāfir raat nahīñ hai

tujh pe maiñ qurbāñ jaanī pyāre ham-nafas-o-ham-dard hamāre
tujh se hai ulfat maiñ ne ḳhabar kī chauñk musāfir raat nahīñ hai

zor na tāqat sañg na sāthī paañv se apne aap hai chalnā
tujh pe hai bhārī rāh-e-safar kī chauñk musāfir raat nahīñ hai

niile niile rañg ke uupar baḌhtī hī jaatī hai safedī
ho ga.ī rañgat zar-o-qamar kī chauñk musāfir raat nahīñ hai

āñkheñ malte sehn-e-chaman meñ jhuum ke uTThe niiñd ke maate
dekh sabā ne aa ke ḳhabar kī chauñk musāfir raat nahīñ hai

ye aañsū DhūñDtā hai terā dāman
musāfir apnī manzil jāntā hai

jis kī ḳhātir qāfila rokā gayā
vo musāfir chal diyā uTh kar kahīñ

ai peshawar maiñ musāfir to nahīñ huuñ lekin
sar jhukā.e hue phirtā huuñ tirī galiyoñ meñ

tumhārī yādoñ ke qāfile kā
thakā huā ajnabī musāfir

safar hai shart musāfir-navāz bahutere
kisī taraf bhī kisī kaam se nikal jaao

hamrāh mire koī musāfir na chalā thā
dhokā mujhe ḳhud apnī hī aahaT se huā thā

hai musāfir-navāz teġh tirī
mujh ko ruḳhsat kiyā gale mil ke