Tags-Musafir

maiñ ne dekhā
ek musāfir us kī chhāñv meñ sustātā thā

vo kaun hai jo musāfir ke saath chaltā hai
ḳhayāl-e-yār bhī jab ham-safar nahīñ rahtā

dil kī nagrī se ka.ī ek musāfir guzre
koī Thahrā hī nahīñ hai dil-e-be-pīr ke saath

'nasīm' gaañv kī masjid meñ raat kāTegā
ik ajnabī sā musāfir hai kis ke ghar jaa.e

ham kaun haiñ kyuuñ baiThe haiñ yuuñ rāhguzar par
pūchhā na kisī ik bhī musāfir ne palaT ke

do qadam chal aate us ke saath saath
jis musāfir ko akelā dekhte

raat ke āñgan meñ sūraj ke musāfir kā qayām
phuul se jismoñ ko zaḳhmoñ kī qabā de jā.egā

sañg kisī ke chalte jaa.eñ dhyān kisī kā rakkheñ
ham vo musāfir saath apne sāmān kisī kā rakkheñ

shahr ke shahr kā afsāna vo ḳhush-fahm magar saada musāfir
ki jinheñ ishq kī lalkār ke rahzan ne kahā: aao!

jo lauT aa.e koī safar se to phir musāfir kahāñ rahā vo
vahī musāfir hai jo safar meñ hai aur kabhī lauT kar na aa.e

mushkil ye imtiyāz tirī rāhguzar meñ hai
manzil safar meñ hai ki musāfir safar meñ hai

kabhī raste ye ham se pūchhte haiñ
musāfir ho rahe haiñ dar-ba-dar kyā

musāfir hī musāfir har taraf haiñ
magar har shaḳhs tanhā jā rahā hai

ik thakā haarā musāfir koī dam lene ko
būḌhe bargad se koī ek pahar māñge hai

karb-e-manzil kā ho kyā ehsās in ashjār ko
jin ke saa.e meñ musāfir koī Thahrā hī nahīñ

bāñdh sag-e-āvāra chaukhaT ke andar
ek musāfir tujh se rastā māñgtā hai

raah jo un ko tum na dikhāte
kaise musāfir rasta paate

tā-ba-kai manzil-ba-manzil ham musāfir bhāgte
aañkh ab Thahrī huī hai aur manāzir bhāgte

letī haiñ yuuñ safar meñ musāfir kā imtihāñ
hamvār rāstoñ pe ubhartī haiñ sīḌhiyāñ

ḳhvāhish ke musāfir to ab tak tārīki-e-jāñ meñ chalte haiñ
ik dil ke nihāñ-ḳhāne meñ kahīñ jaltī hai sham-e-zamīr to kyā