Tags-Naqab

naqāb-e-shab meñ chhup kar kis kī yaad aa.ī samajhte haiñ
ishāre ham tire ai sham-e-tanhā.ī samajhte haiñ

laila-e-nāz barafganda-naqāb aatī thī
apnī āñkhoñ meñ liye dāvat-e-ḳhvāb aatī thī

saraktī jaa.e hai ruḳh se naqāb āhista āhista
nikaltā aa rahā hai āftāb āhista āhista

insāñ ulaT rahā hai ruḳh-e-zīst se naqāb
maz.hab ke ehtimām fusūñ-parvarī kī ḳhair

haqīqatoñ ko tamāshā nahīñ banā.ūñgā
munāfiqat kī havā hai naqāb de jaao

us nāz-e-hosh ko ki hai muusā pe tāna-zan
ik din naqāb ulaT ke pashīmāñ to kījiye

chaman meñ shab ko jo vo shoḳh be-naqāb aayā
yaqīn ho gayā shabnam ko āftāb aayā

kaho ki mehr-e-sub.h-tāb aa.e ho ke be-naqāb
koī bas aa chukā kisī kā intizār kar liyā

shauq ne khīch lī mire yaar kī jab naqāb-e-ruḳh
husn kī raushnī huī jalva-gah-e-majāz meñ

tum ek baar to ruḳh se naqāb sarkā do
hazāroñ tālib-e-dīdār aa ke baiThe haiñ

khā.eñ fareb roz uThā.eñ naqāb roz
har shaḳhs kyā hai aur kahāñ dekhte chaleñ

naqāb ulTī hai ye kah kar kisī ne
ki ab to koī nā-mahram nahīñ hai

ruḳh-e-raushan se yuuñ uTThī naqāb āhista āhista
ki jaise ho tulū-e-āftāb āhista āhista

dekhiye to naqāb ulaT ke zarā
chāñd kab tak ayaañ nahīñ hotā

bhulā ke rakhte haiñ jo log sach kī kaḌvāhaT
jo mīThe lafzoñ kī har-dam naqāb māñgte haiñ

zulf-ba-dosh be-naqāb ghar se nikal khaḌe hue
ab to samajh ga.e huzūr nāloñ meñ kuchh asar bhī hai

maiñ ḳhud bhī karnā chāhtā huuñ apnā sāmnā
tujh ko bhī ab naqāb uThā denī chāhiye

ye to na kahiye vaqt-e-dīd sab thī ḳhatā nasīm kī
aap ne rū-e-nāz pe Daalī naqāb jaan ke

un ke ruḳh se naqāb aaj uThegī ab nazāroñ kī merāj hogī
ek muddat se aaj ahl-e-ġham ko muskurāne kī mohlat milegī

thā naqāb meñ ab tak be-hijāb jab dekhā
faash ho gayā āḳhir us kā bad-numā chehra