Tags-Naqab

charāġh-e-tūr jalāo baḌā añdherā hai
zarā naqāb uThāo baḌā añdherā hai

sharm-e-rusvā.ī se jā chhupnā naqāb-e-ḳhāk meñ
ḳhatm hai ulfat kī tujh par parda-dārī haa.e haa.e

mahkūm bastiyoñ se sarakne lagī hai dhuup
vo ahd huuñ ki jis ne shafaq be-naqāb kī

gar naqāb us ke muñh se uTThī nahīñ
shor kyuuñ kārvāñ se uThtā hai

ye kāvish-e-umīd-o-bīm bhī hai lazzat-āfrīñ
nazar udhar jamī huī naqāb-e-ruḳh uThā huā

dil āshiq kā kalī kī tarah khiltā jaa.e ḳhush ho ho
adā siiñ jab kabhī khole naqāb āhista āhista

vasl meñ bekār hai muñh par naqāb
sharm kā āñkhoñ pe pardā chāhiye

aa.e vo bahr-ayādat Daal kar ruḳh par naqāb
rah gayā armān dil meñ āshiq-e-nāshād kā

raushnī hogī to kitne chehre hoñge be-naqāb
kah do ye 'afroz' se ki tīrgī baaqī rahe

falak huā mehrbāñ phire din shab-e-visāl aa ga.ī to is ne
bahār-e-lutf-o-karam dikhā kar naqāb-e-sharm-o-hayā uThā kar

shoḳhī se kashmakash nahīñ achchhī hijāb kī
khul jā.egī girah tire band-e-naqāb kī

ai mehr-vash to kyūñkar parde meñ chhup sakegā
abr-e-tunak kī sūrat muñh par naqāb hogā

jān-e-man terī be-naqābī ne
aaj kitne naqāb beche haiñ

kis liye hai naqāb meñ chehra
paḌhne vaalī kitāb de diije

abhī naqāb-kushā.ī-e-husn hai dushvār
vahī uThe hue parde uThā rahā hai koī

na jaane kaun haiñ ye log jo ki sadiyoñ se
pas-e-naqāb mire saath saath chalte haiñ

darūn-e-sīna koī chīḳhtā hai shām-o-sahar
ye qahqahe to haiñ ruḳh par naqāb kī sūrat

ho gayā huuñ maiñ naqāb-e-rū-e-raushan par faqīr
chāhiye tah-band mujh ko chādar-e-mahtāb kā

bulā rahā hai kahīñ ishq sū-e-dār-o-rasan
pukārtā hai kahīñ husn-e-be-naqāb mujhe

bāñdhā hai ab naqāb to phir kas ke bāñdh le
ik ghūñT pī ke ye na ho baḌh jaa.e pyaas aur