Tags-Naqab

DhūñDhegā sahāb chhupne ko mehr
jis roz vo be-naqāb hogā

maiñ jo tirā hijāb huuñ kis liye be-naqāb huuñ
parda ho jis kā chaak chaak parde meñ muñh chhupā.e kyuuñ

naqāb chehre se us ke kabhī saraktā thā
to kaale bādaloñ meñ chāñd sā chamaktā thā

takallufāt kā mausam guzar gayā sāhab!
naqāb ruḳh se uThāo bahār ke din haiñ

maiñ dekhtā hī rahā pattharoñ kī bārish meñ
mire habīb kā chehra bhī ik naqāb meñ thā

jal gayā tuur ġhash hue muusā
jab tirā husn be-naqāb huā

dekhnā hoñgī raḳhna-gar nazreñ
māne-e-dīd agar naqāb huā

rāste zehānat ke tājiroñ pe khulte haiñ
is sadī ke chehroñ ko be-naqāb karnā hai

mujhe jalvoñ kī us ke tamīz ho kyā mere hosh-o-havās bachā hī nahīñ
hai ye be-ḳhabarī ki ḳhabar hī nahīñ vo naqāb uThā ki uThā hī nahīñ

ahl-e-nazar vasī.a gar apnī nazar kareñ
zarre naqāb ulaT ke tujhe jalva-gar kareñ

kal sajā thā jin ke chehroñ par mohabbat kā naqāb
kitnī hairat se unheñ maiñ aaj taktā rah gayā

achchhā huā sahar ne ulaT dī naqāb-e-fikr
bhaTkā diyā thā raat mujhe vaah vaah ne

naqāb uTThī to apnā aalam na tark-e-jalva na tāb-e-jalva
nazar uThī baar baar lekin jhapak ga.iiñ baar baar āñkheñ

numā.ishī rasm-e-parda-dārī rahegī jab tak to ye bhī hogā
naqāb sarkegī jab zarā bhī uTheñgī be-iḳhtiyār āñkheñ

nā-fahmī apnī parda hai dīdār ke liye
varna koī naqāb nahīñ yaar ke liye

ruuyā kahūñ maiñ is ko yā muzhda-e-bedārī
ġhul hai ki naqāb us ne chehre se uThā Daalī

na ulTī us ne mahfil meñ naqāb avval se āḳhir tak
rahī phir bhī tajallī-e-barq-e-tāb avval se āḳhir tak

ārā.ish-e-jamāl se fāriġh nahīñ hunūz
pesh-e-nazar hai aa.ina daa.im naqāb meñ

subah ko thā farsh par pattoñ kā Dher
be-numū miTTī ke chehre ke naqāb