Tags-Naqab

ruḳh-e-raushan se yuuñ uTThī naqāb āhista āhista
ki jaise ho tulū-e-āftāb āhista āhista

hai takalluf naqāb ve ruḳhsār
kyā chhupeñ āftāb haiñ donoñ

hujūm nazroñ kā hai vo muñh par diyā hai dono ko jis ne dhokā
yaqīñ ye mujh ko paḌā hai pardā gumāñ ye un ko naqāb meñ huuñ

āvāz meñ to aap kī be-shak ḳhulūs hai
lekin zarā naqāb to ruḳh se haTā.iye

bhalā huā 'josh' ne haTāyā nigāh kā chashm-e-tar se parda
balā se jaatī raheñ gar āñkheñ khulā to band-e-naqāb terā

jab talak jism TuuT kar na gire
zindagī be-naqāb karte raho

hamāre ahd meñ arzānī-e-naqāb na pūchh
maiñ kor chashmoñ kī ḳhātir naqāb kyā letā

hijāb koī nahīñ hai naqāb koī nahīñ
mirī khulī huī āñkhoñ meñ ḳhvāb koī nahīñ

na dekhā ruḳh be-naqāb-e-mohabbat
mohabbat hai shāyad hijāb-e-mohabbat

dekh kar us ruḳh-e-zebā pe naqāb
apnī gustāḳh nazar yaad aa.ī

jab le naqāb muñh par tab diid kar ki kyā kyā
dar-parda shoḳhiyāñ haiñ phir be-hijābiyāñ haiñ

ulTā udhar naqāb to parde paḌe idhar
āñkhoñ ko band jalva-e-dīdār ne kiyā

naqāb oḌh ke aa.e the raat ke qazzāq
pighaltī shaam se sab dhuup kā ḳhazāna gayā

zarā naqāb-e-hasīñ ruḳh se tum ulaT denā
ham apne dīda-o-dil kā ġhurūr dekheñge

baiThe ho tum jo chehre se ulTe naqāb ko
phailā huā hai chaar taraf shab ko nūr-e-sub.h

har rag-e-ḳhūñ meñ phir charāġhāñ ho
sāmne phir vo be-naqāb aa.e

jī meñ aatā hai ulaT deñ un ke chehre se naqāb
hausla karte haiñ lekin hausla hotā nahīñ

uTThe naqāb jahāñ se yārab jis se takalluf beach meñ hai
jab nikle us raah se ho kar muñh tum ham se chhupā.e ga.e

jab tilism-e-ā.īna ḳhud ho naqāb-e-ā.īna
chashm par kaise hijāb-e-ā.īna-ḳhāna khule

bas Daal lo chehre pe naqāb apne ḳhudārā
be-rabt huī jaatī hai taqrīr hamārī