Tags-Naqab

ban gayā hai naqāb-e-tañg-dilī
shohra-e-vus.at-e-nazar dekhā

tole hue hai teġh-o-sināñ husn-e-be-naqāb
nāvak-fagan hai jalva-e-pinhān-e-lucknow

sunā thā ham ne ki hashr meñ vo dikhāne vaale haiñ apnā jalva
magar jo dekhā to aaj bhī vo jamāl-e-rañgīñ naqāb meñ hai

gar vo naqāb uThā de chehre se to 'hasan' phir
kuchh ġham nahīñ mah-o-mehr aalam meñ go na nikleñ

aap ne hosh kho diye mere
aaj hī be-naqāb honā thā

ishq ko kāmyāb honā thā
aap ko be-naqāb honā thā

har ek sher meñ 'āzar' nuqūsh haiñ us ke
magar vo ḳhud ko kabhī be-naqāb bhī na kare

tum haTā do ye apne chehre se
ham ne kaafī naqāb dekhe haiñ

aa ai naqāb-posh-e-azal aa qarīb-tar
parda ulaT ke aa ki terā mudda.ā haiñ ham

un kā chehra tah-e-naqāb 'aḳhtar'
jaise parde meñ ik charāġh jale

jahāñ meñ maut ne ulTī naqāb-e-zindagī jis dam
yaqīñ se ḳhud badalnā hī paḌā āḳhir gumāñ apnā

vo shoḳh baam pe jab be-naqāb aa.egā
to māhtāb-e-falak ko hijāb aa.egā

kalīm haañ dil-e-betāb ko sambhāle hue
sunā hai tuur pe vo be-naqāb aa.egā

phailā huā hai husn-e-āriz-e-raushan naqāb meñ
kyā kyā taḌap rahī hai tajallī hijāb meñ

jo naqāb-e-ruḳh uThā dī to ye qaid bhī lagā dī
uThe har nigāh lekin koī baam tak na pahuñche

mujh se jal-thal huā hai mirā andarūñ
maiñ ne kar hī diyā be-naqāb aadmī

naqāb kahtī hai maiñ parda-e-qayāmat huuñ
agar yaqīn na ho dekh lo uThā ke mujhe

saraktī jaa.e hai ruḳh se naqāb āhista āhista
nikaltā aa rahā hai āftāb āhista āhista

sahar huī na mire shahr-e-ārzū meñ kabhī
ki mehr-e-husn kī kirneñ pas-e-naqāb rahīñ

ye tamāshā to kareñ ruḳh se uThā deñ vo naqāb
ek aalam ko magar mahv-e-tamāshā na kareñ