Tags-Nasha

vo hasīn chehroñ kī bhiiḌ thī ki nazar bhaTaktī hī rah ga.ī
tirī justujū kā nasha thā jo kisī moḌ par vo utar gayā

marhabā ai sāqī-e-jādū-nazar sad-marhabā
mast āñkhoñ ne mirā nashsha do-bālā kar diyā

nahā kar ḳhuun meñ kāñToñ pe aksar raqs kartā huuñ
ye mastī be-ḳhudī kī hai ye nashsha zindagī kā hai

mai barastī hai fazāoñ pe nasha taarī hai
mere saaqī ne kahīñ jaam uchhāle hoñge

muflisī hosh uḌā detī hai insānoñ ke
ye nasha kam ho to daulat kā nasha chāhte haiñ

dāman-e-nashsha dete nahīñ haat se
riñd girte bhī haiñ aur sambhalte bhī haiñ

jaise chaḌh jaatā hai nasha 'bādal'
zehn par chhā.eñge tumhāre ḳhayāl

gar ham nashe meñ bosa kaheñ do to lutf se
tum paas muñh ko lā ke ye hañs kar kaho ki lo

vo merī chashm-e-tar meñ aa gayā hai
nasha ban ke jo mujh pe chhā gayā hai

ehsās bikhrā bikhrā sā haarā huā badan
chaḌhtī harārtoñ kā nasha kaun le gayā

tire ḳhayāl kā nashsha utartā jaatā hai
Thahar Thahar ke koī pal guzartā jaatā hai

pau phaTī añg añg TūTtā hai
aur nasha hai ki TūTtā hī nahīñ

ḳhvāb kyā hai ki TūTtā hī nahīñ
ik nasha hai ki TūTtā hī nahīñ

jis nazar meñ sharāb sā hai nasha
us nazar kā ḳhumār chāhtā huuñ

āshiq hai jo tumhāre ruḳh-e-surḳh-rañg kā
rahtā hai us ko nashsha sharāb-e-farañg kā

nashsha aisā thā ki mai-ḳhāne ko duniyā samjhā
hosh aayā to ḳhayāl aayā ki ghar jaanā hai

baat hai me.aar kī to mai-kade jaate nahīñ haiñ
par nashe meñ haiñ nasha ulfat kā kar ke aa ga.e ham

paañv meñ vo nasha talab kā nahīñ
ab to sarmast-e-ḳhvāb haiñ donoñ

dimāġh meñ huuñ qadah-kashoñ ke dahan meñ aayā huuñ mah-vashoñ ke
nasha vo huuñ jo sharāb meñ huuñ mazā vo huuñ jo kabāb meñ huuñ

mazā hai saaqī tire karam se zuhūr merā hai tere dam se
vo baada huuñ jo huuñ mai-kade meñ vo nashsha huuñ jo sharāb meñ huuñ