Tags-Nasha

tauba kī magar nashshe se us hūr-shiyam ne
kyuuñ ātish-e-mai nār-e-jahannam nazar aa.ī

kyā jaane kis ke ġham meñ haiñ āñkheñ hamārī laal
ai ham ne go nasha bhī piyā phir kisī ko kyā

haveliyoñ kā tumtarāq TuuT kar bikhar chukā
chaman se ab bahār kā har ik nasha utar chukā

ye mai-kada hai nahīñ mai-kasho ye dhokā hai
yahāñ to nashsha tah-e-jām bhī nahīñ hotā

TuuT jā.egā nasha dekh koī naam na le
aañkh bhar aa.egī is tarah mirā jaam na bhar

jaise koī yaad aa rahā ho
āñkhoñ meñ nasha pighal rahā hai

paañv rukte hī nahīñ zehn Thahartā hī nahīñ
koī nashsha hai thakan kā ki utartā hī nahīñ

chashm-e-bad-dūr terī āñkhoñ meñ
nashsha hai yā ḳhumār hai kyā hai

nashsha to tere qurb kā hai jān-e-tamannā
kyā lutf tire ba.ad sharāboñ meñ rahegā

tire jamāl kā nashsha sharāb jaisā hai
hamārī āñkhoñ se us kā surūr chamkegā

rach rahā thā dhīre dhīre mujh meñ nashsha tīrgī kā
kaun thā jo mere paimāne meñ rāteñ gholtā thā

ye bhī nasha mai-kasho kuchh kam nahīñ
de na de saaqī pa tum samjho diyā

baḌī lazzateñ haiñ gunāh meñ jo na kījiye
jo na pīji.e to ajab nasha hai sharāb meñ

TuuT gayā phir ġham kā nasha bhī
dukh kitnā sukh de saktā thā

farq kyā mujh ko paḌā ek shikast aur sahī
hai ajab sā hī nasha maat ke khā jaane meñ

saañp Dase ik umr huī
nashsha ab tak taarī hai

jaan kyā ab tirā piyāla-e-nāf
nashsha mujh ko nahīñ pilāne kā

muddat ke ba.ad niiñd kī lazzat na pūchhiye
nashsha chaḌhā huā thā so chaḌhtā chalā gayā

jab us ko nashsha chaḌhtā hai ghar meñ ye ġhazab sī aatī hai
jab aadhī raat guzar jaa.e parvīn club se aatī hai

khuleñgī āñkheñ nashsha utregā
husn tak uuprī ye mastī hai