Tags-Nasha

nasha pilā ke girānā to sab ko aatā hai
mazā to tab hai ki girtoñ ko thaam le saaqī

nashsha shīshe meñ añgḌā.ī lene lagā bazm-e-rindāñ meñ sāġhar khanakne lagā
mai-kade pe barasne lagīñ mastiyāñ jab ghaTā ghir ke aa.ī mazā aa gayā

nashsha thā chaḌhāo par sahar-dam
paimāna-e-umr ghaT rahā thā

kuchh usūloñ kā nasha thā kuchh muqaddas ḳhvāb the
har zamāne meñ shahādat ke yahī asbāb the

tirī mast aañkh ne ai sanam mujhe kyā nazar se pilā diyā
ki sharāb-ḳhāne ujaḌ ga.e jo nasha chaḌhā thā utar gayā

tū mirā hamdam-o-hamrāz na ban
maiñ to nashsha huuñ utar jā.ūñgā

ham bāda-o-jām ke parde meñ kuchh rāz-e-junūñ kah jaate haiñ
jab ishq kā nashsha chaḌhtā hai maḳhmūr tabī.at hotī hai

nashsha-bandī chāhte to haiñ ye haamī diin ke
phir bhī mil jaa.e to pī leñ shīr-e-mādar kī tarah

hameñ vo jaan bhī leñge hameñ pahchān bhī leñge
utar jā.egā sab nashsha abhī chaḌhtī javānī hai

us kī āñkhoñ ke piyāle nāchte haiñ
kho ga.e kitne nasha hone se pahle

havā meñ nashsha hī nashsha fazā meñ rañg hī rañg
ye kis ne pairahan apnā uchhāl rakkhā hai

nashsha chaḌhā to raushniyāñ sī dikhā.ī diiñ
hairān huuñ ki maut kā sāġhar siyāh thā

tirī āñkhoñ meñ pal-bhar jhāñkne se
mohabbat kā nasha ho jā.egā kyā

sau jaam kā nasha hai saaqī tirī nazar meñ
kahte haiñ bāda-kash bhī mujh ko tirā sharābī

pyaar ke is nashsha ko koī kyā samjhe
Thokar meñ jab saarā zamāna lagtā hai

nashsha hī kuchh aisā thā futūhāt kā us par
jazbāt ke tausan se sikandar nahīñ utrā

dil-o-nigāh pe kyuuñ chhā rahā hai ai saaqī
ye terī aañkh kā nashsha sharāb se pahle

achchhā huā ki merā nasha bhī utar gayā
terī kalā.ī se ye kaḌā bhī utar gayā

sach bolne meñ nashsha ka.ī botaloñ kā thā
bas ye huā ki merā galā bhī utar gayā