Tags-Nasha

kis kī ā.ankhoñ kā nasha hai ki mire hoñToñ ko
is qadar tar nahīñ kar saktī balā-noshī bhī

ye hai ahl-e-zarf kī anjuman ye hai ahl-e-ishq kā mai-kada
tū hazār nashshe meñ chuur ho jo yahāñ pe aa to sambhal ke aa

taare se TūTte haiñ abhī tak idhar-udhar
baaqī hai kuchh nasha abhī kal kī uḌaan kā

mirī dil meñ nashshe kā hai makāñ mujhe sūjhtī haiñ vo mastiyāñ
ki khajūrī choTiyoñ vāliyāñ paḌī phirtī haiñ mire taaḌ meñ

sad-ātisha agar ho tirā rañg-rūp hai
jo rañg phuul meñ hai nasha hai sharāb meñ

ye kaisā nasha musallat thā ab ke zehnoñ par
tabāhiyoñ se rahe sab hī be-ḳhabar ab ke

ḳhvāboñ se ik ḳhumār meñ malbūs vo badan
ik rañg-e-nashsha thā jo mire ḳhuuñ meñ khil gayā

palkeñ bojhal, āñkheñ band, havās musaḳhḳhar
chaḌhtī dhuup meñ ik nasha thā

yāroñ ko kisī taur bhī nashsha nahīñ hotā
jab tak ki na shāmil ho mai-e-nāb ġhazal meñ

is cocktail kā to nasha hī kuchh aur hai
ġham ko ḳhushī ke saath milā kar sharāb pī

hameñ bichhḌe hue arsa huā par
abhī tak dil meñ hai nashsha tumhārā

kyā asar thā nigāh-e-sāqī meñ
nashsha utrā na umr bhar apnā

vahshat se har suḳhan mirā goyā ġhazāla hai
bū se nasha ho ye vo mai-e-der-sālā hai

hosh kyā aayā musalsal jal rahā huuñ hijr meñ
ik sunahrī raat kā nashsha utar jaane ke ba.ad

nadī ke donoñ taraf saarī kashtiyāñ gum thiiñ
bahut hī tez thā ab ke nasha ravānī kā

hoñToñ se jo phir jaatī hai muñh kī taraf ai jaan
kyā nashshe meñ bahkī huī hai baat tumhārī

nas nas meñ phisaltā hai tire qurb kā nashsha
har mauja-e-ḳhūñ-nāb kī gahrā.ī ajab hai

maiñ paḌh kar hosh kho baiThā tire qisse ko ai furqat
mohabbat kā nasha hai is shab-e-ġham kī kahānī meñ

ye kaisā nashsha hai āḳhir jo TūTtā hī nahīñ
koī pukār rahā hai gilās se niklo

jab us kā raat kā nashsha utarne vaalā thā
ġhamoñ ko ghol ke ham ne use pilā.e din