Tags-Nasha

sarsabz mausamoñ kā nasha bhī mire liye
talvār kī tarah hai havā bhī mire liye

maiñ umr bhar ke liye ḳhud ko bhuul baiThā thā
koī pukār nahīñ thī vo ek nashsha thā

dekh kar us hasīn paikar ko
nashsha sā aa gayā samundar ko

chaḌhā huā hai abhī ham pe hijratoñ kā nasha
palaT ke ā.eñge ik din kisī bahāne ham

karūñ zikr kyā maiñ shabāb kā sune kaun qissa ye ḳhvāb kā
ye vo raat thī ki guzar ga.ī ye vo nashsha thā ki utar gayā

nashsha-e-jur.at ziyāda ho gayā ai mai-kasho
sāġhar-e-mai ban gayā kaasa sar-e-sohrāb kā

sat.h-e-doyā pe idhar nashshe meñ lahrā.ī huī
rañg laa.ī huī chhā.ī huī barsāt kī raat

ai shīsha-e-jāñ tujh meñ lahū ḳhatm bhī hogā
ye nashsha utar jā.egā tāsīr dikhā kar

maiñ bahak jā.ūñ to ye merī tunuk-zarfī hai
aur agar nashsha na ho kis kī hatak hai saaqī

ajab nasha hai tire qurb meñ ki jī chāhe
ye zindagī tirī āġhosh meñ guzar jaa.e

'shahīdī' itnī gumāñ-parastī nashe meñ sab bhuul baiThe hastī
huī hai us se hī tum ko mastī jo tā-gulū bhī nahīñ ga.ī hai

aisā nashsha to zahr meñ bhī na thā
ai ġham-e-dil tirī misāl kahāñ

nasha thā mujh ko aur yāroñ ne chāhā chhīn leñ botal
magar kaam aa ga.ī kuchh jur.at-e-rindāna mastī meñ

mai-kada mere liye jā-e-tasādum to nahīñ
laakh nashsha hai magar hosh mire gum to nahīñ

rañg bhī āḳhir utarne meñ to kuchh letā hai vaqt
husn āḳhir husn thā jis kā nasha rahnā hī thā

ek nashsha rahtā hai tujh se mil ke pahroñ tak
nashsha jab nahīñ hotā aur ham bahakte haiñ

nashe meñ chuur na hoñ jhāñjh meñ maḳhmūr na hoñ
pand ye pīr-e-ḳharābāt ne farmā.ī hai

mai-kade meñ to nasha baTtā hai
kaun yaañ jāñche bure aur bhale

tū apne āshiq ko saath rakh le
bichhaḌ gayā to nasha karegā