Tags-Phool

tumhārī yādoñ ke phuul aise sahar ko āvāz de rahe haiñ
ki jaise ThanDī havā kā jhoñkā mirī galī se guzar rahā hai

apnī ḳhushbueñ utarne do hamāre jism meñ
phuul kī sūrat khileñge ham sabā ho jā.eñge

dhartī aur ambar par donoñ kyā ra.anā.ī baañT rahe the
phuul khilā thā tanhā tanhā chāñd ugā thā tanhā tanhā

vahī ik sadāqat-e-harf thī khilī phuul ban ke jo aag meñ
vahī ik dalīl-e-hayāt thī jo gavāh-e-bā-ḳhabarī rahī

jis ne kiye haiñ phuul nichhāvar kabhī kabhī
aa.e haiñ us kī samt se patthar kabhī kabhī

jinhoñ ne kāñToñ pe chalnā hameñ sikhāyā thā
hamārī raah meñ vo phuul ab bichhāne lage

jin kā saarā jism hotā hai hamārī hī tarah
phuul kuchh aise bhī khilte haiñ hamesha raat ko

shabnam ke aañsū phuul par ye to vahī qissa huā
āñkheñ mirī bhīgī huī chehra tirā utrā huā

ḳhudā ābād rakhe ham-safīrān-e-gulistāñ ko
jo koī phuul khultā hai to ham ko yaad karte haiñ

aish-e-rafta ne bahut ḳhuun rulāyā hai mujhe
phuul kī sej ne kāñToñ pe sulāyā hai mujhe

hai shola-e-jāñ meñ yaad terī
kyā aag meñ phuul khil rahā hai

gul-rū baġhair ḳhāna-e-bulbul ḳharāb hai
murjhā rahā hai sehn-e-gulistāñ meñ phuul aaj

darūd paḌhte hue us kī diid ko nikleñ
to sub.h phuul bichhā.e sabā hamāre liye

ye rañgīñ sub.h chaman-dar-chaman haiñ khilte phuul
tū aa gayā to hue din bhī ye suhāne se

lagne dūñgā na havā tujh ko ḳhizāñ kī maiñ 'zafar'
phuul jaisā tirā anjām na hone dūñgā

jamā thā jis vaqt rañg-e-sohbat thā nek-o-bad meñ bhī lutf-e-ḳhullat
magar ḳhizāñ aa.ī yā qayāmat na phuul dekhā na ḳhaar dekhā

nasīm-e-zindagī ke soz se murjhā.ī jaatī hai
ye hastī phuul kī ik pañkhuḌī ma.alūm hotī hai

zaḳhm ko apne phuul samajhnā motī kahnā ashkoñ ko
ishq kā kārobār sajānā ham ko achchhā lagtā thā

kabhī dasht meñ ḳhaar pe hai chalnā, kabhī aag kā phuul meñ hai Dhalnā
kabhī tanhā dhuup meñ hai chalnā, use ishq kā hī in.aam likho

rāteñ mahkī, sāñseñ dahkī, nazreñ bahkī, rut lahkī
sapn salonā, prem khilaunā, phuul bichhaunā, vo pahlū