Tags-Phool

le ga.ī khīñch ke shāyad unheñ miTTī kī mahak
uḌ ke pahuñche nahīñ kuchh phuul shajar tak ab bhī

phuul khilne lage the sahrā meñ
sāmne phir sarāb aa.e the

sehn-e-gulshan meñ hasīñ phuul khile the kab se
ham hue ḳhud hī tamāshā.ī bahut der ke ba.ad

chauk meñ ik tasvīr lagā.ī phūloñ kī
dekhā dekhī chāroñ raste phuul hue

ghar ne dekh liyā aate pardesī ko
khil uTThe darvāze taale phuul hue

jab tak harf raheñge tum bhī mahkoge
tum mere ash.ār meñ aa.e phuul hue

us dar ke phūloñ kā aalam kyā hogā
jis ko chhū kar mere jaise phuul hue

kāñTe us zarḳhez nazar ke shaidā.ī
jo bhī is meñ aan samā.e phuul hue

resha buntī makḌī ḳhushbū meñ Duubī
ik aahaT par saare jaale phuul hue

itnī mohlat khilne aur mahakne kī
ġham ne dī aur ham bhī us ke phuul hue

chhāchh bilone vaalī muddat ba.ad hañsī
dīvāroñ par chaspāñ uple phuul hue

ham haiñ jin par ma.anī badle jaate haiñ
ham haiñ jin par kañkar tere phuul hue

kis hiddat se guzre kaise phuul hue
kyā mausam thā jab añgāre phuul hue

kabhī din kī dhuup meñ jhuum ke kabhī shab ke phuul ko chuum ke
yuuñ hī saath saath chaleñ sadā kabhī ḳhatm apnā safar na ho

ye phuul kal tak sahar ke āñgan meñ khil rahā thā
magar siyāhī ke tañg halqoñ meñ ghir gayā thaa!

in bahāroñ kī aabrū rakh lo
muskurāo ki phuul khil jaa.eñ

rahe dāman bharā un kā hamesha
lahad par phuul jo barsā rahe haiñ

har tarah ke phuul haiñ dil kī zamīñ par dekhiye
kis tarah kah duuñ nahīñ siine se ḳhanjar āshnā

mere bachpan kā zamāna phuul kā ambār thā
jaise hī bachpan gayā ambār Tiile ho ga.e

mai-kashoñ ne bas qadam rakkhā thā sehn-e-bāġh meñ
phūl-patte bel-būTe sab nashīle ho ga.e