Tags-Phool

bāhar se thā ḳhaar 'sadā' tū
andar phuul sā komal niklā

phuul kā khilnā bahut dushvār hai
mausam-e-gul āj-kal bīmār hai

vo phuul se lamhe bhārī haiñ ab yaad ke nāzuk shānoñ par
jo pyaar se tum ne sauñpe the āġhāz meñ ik dīvāne ko

ai dīda-e-giryāñ kyā kahiye is pyār-bhare afsāne ko
ik sham.a jalī bujhne ke liye ik phuul khilā murjhāne ko

nasīm-e-sub.h ne aa kar vo rāgnī chheḌī
har ek phuul ne kāñTe ko jhuk ke pyaar kiyā

jab andāz bahāroñ ke yaad aate haiñ
ham kāġhaz par kyā kyā phuul banāte haiñ

mire badan meñ chhupī aag ko havā degā
vo jism phuul hai lekin mujhe jalā degā

taare kahīñ haiñ phuul kahīñ haiñ guhar kahīñ
bikhre hue haiñ ashk hamāre kahāñ kahāñ

phuul is ḳhāk-dāñ ke ham bhī haiñ
mudda.ī do jahāñ ke ham bhī haiñ

aib nahīñ hai is meñ koī lāl-parī na phūl-kalī
ye mat pūchho vo achchhā hai yā achchhī nādārī hai

tum ko nahīñ ḳhabar ki mahakne lagā hai dil
kāġhaz pe us ne phuul banā.e mire liye

sabhī ne eid manā.ī mire gulistāñ meñ
kisī ne phuul piro.e kisī ne ḳhaar chune

ham hañse to āñkhoñ meñ tairne lagī shabnam
tum hañse to gulshan ne tum pe phuul barsā.e

thak ke so gayā sūraj shaam ke dhuñdlakoñ meñ
aaj bhī ka.ī ġhunche phuul ban ke murjhā.e

husn-e-bīmār tujhe phuul diye haiñ maiñ ne
in meñ hone the magar zaḳhm bhī shāmil mere

logoñ kī chādaroñ pe banātī rahī vo phuul
paivand us ne apnī qabā meñ sajā liye

sub.h kā āġhāz thā aur chehre par thī gard-e-shab
phuul kī sūrat shagufta maiñ nahā kar ho gayā

shohrat tanhā tai kartī hai raste ko
uḌ kar phuul nahīñ jaatā mahkār ke saath

chāñd tāroñ ke phuul murjhā.e
jab bhī shabnam kī aañkh bhar aa.ī

sab jānte haiñ tum boltī ho
to phuul laboñ se jhaḌte haiñ