Tags-Phool

jin kī shah-e-rag kā lahū phuul kī añgḌā.ī thā
un ko ab hāl-e-gulistāñ na batāo yaaro

pahlā phuul khilā thā dil meñ
lahū meñ ḳhushbū dauḌ ga.ī thī

kabhī kitāboñ meñ phuul rakhnā kabhī daraḳhtoñ pe naam likhnā
hameñ bhī hai yaad aaj tak vo nazar se harf-e-salām likhnā

vo ḳhushbū is ta.alluq se bahut bechain sī hogī
maiñ kāñTā thā magar ik phuul ke bistar meñ rahtā huuñ

phuul ko hairat-zada sā dekh kar
har kalī gulshan meñ hairāñ ho ga.ī

phuul to phuul the ai ḳhāna-bar-andāz-e-chaman
tū ne kāñToñ se bhī dāman mujhe bharne na diyā

adā-e-nīm-nigāhī bhī kyā qayāmat hai
ki ban ke phuul vo zaḳhm-e-ḳhadañg mahke hai

khiltā hai vo phuul abhī ik khiḌkī meñ
jis ko āḳhir-kār mahaknā mujh meñ hai

phuul alfāz ke pheñke haiñ usī kī jānib
jaane vo jān-e-adā naaz se kab bol uThe

kabhī us raah meñ phal-phūl lagā karte the
ab lahū kāTte haiñ kābul-o-qandhār ke beach

vo phuul ho sitāra ho shabnam ho jhiil ho
terī kitāb-e-husn ke sab iqtibās the

mere maazī ke chaman meñ the jo kuchh yādoñ ke phuul
rafta rafta zindagī kī dhuup meñ kumhlā ga.e

havā ke lams se chehre pe phuul khilte the
vo chāñdnī sā badan mauja-e-sabā thā bahut

tujh ko nisbat hai agar nām-e-barāhīm se kuchh
aag ko phuul samajh aag se Dartā kyuuñ hai

chāñd sitāre
phuul banafshī patte

munāfiq phuul bhī laa.e to kāñTe saath aate haiñ
uThā apnā ye guldasta hamāre sāmne mat aa

girā.īñ shāḳh shāḳh se ḳhizāñ ne phuul pattiyāñ
uḌe jo biij har taraf to phir bahār aa ga.ī

ho gayā ḳhvāb phuul sā chehra
shāḳh-e-dil bhī harī-bharī na rahī

dekhtā huuñ phuul aur kāñTe ba-har-sū aaj bhī
yaad kartā huuñ tirī ḳhushbū tirī ḳhū aaj bhī

hamesha hāthoñ meñ hote haiñ phuul un ke liye
kisī ko bhej ke mañgvāne thoḌī hote haiñ