Tags-Phool

tire dil meñ masarrat ke khileñ phuul
mire dil meñ bahār aa.e na aa.e

phuul aage na mire toḌ zarā ai gulchīñ
kah tū sair-e-gul-o-gulzār karūñ yā na karūñ

phuul vo rakhtā gayā aur maiñ ne rokā tak nahīñ
Duub bhī saktī hai merī naav sochā tak nahīñ

maiñ rāj-dulārā huuñ
maiñ phuul se pyārā huuñ

vo aa.ī aur vahīñ tāqchoñ meñ phuul rakhe
jo maiñ ne nazr ke patthar pe jānvar rakkhā

zikr-e-gulzār sahī qissa-e-dil-dār sahī
zaḳhm ke phuul hī mahkāo ki kuchh raat kaTe

phuul sahrā meñ khilā de koī
maiñ akelā huuñ sadā de koī

phuul phir zaḳhm bane haiñ 'nāsir'
phir ḳhizāoñ ko duā de koī

is lab kuuñ kab pasand haiñ rasmī kaToriyāñ
laala ke phuul kī haiñ jise qahva ḳhoriyāñ

hirmāñ to dekh phuul bikhere thī kal sabā
ik barg-e-gul girā na jahāñ thā mirā qafas

shāḳh se phuul ko phir judā kar diyā
zaḳhm peḌoñ kā kis ne harā kar diyā

phuul hī phuul damakte haiñ karāñ-tā-ba-karāñ
sho.ala-zār-e-ġham-e-hastī se guzar kar dekho

muhtāj nahīñ hai kisht-e-jāñ mausam ke badalte dhāroñ kī
kuchh daaġh to dil meñ be-mausam sau phuul khilā.e rakhte haiñ

kiyāriyāñ nahīñ par phuul ḳhuub haiñ 'vatsal'
ki jañgaloñ meñ bhī ik gulsitāñ rahtā hai

nasīm shāḳh-e-gul-e-tar se kyuuñ ulajhtī hai
chaman meñ phuul agar phir na khil sakā barsoñ

kyuuñ nahīñ khilte ab āñkhoñ meñ ravādārī ke phuul
kyā huā ye kaun rabt-e-darmiyānī le gayā

maiñ jis ke haath meñ ik phuul de ke aayā thā
usī ke haath kā patthar mirī talāsh meñ hai

sūkhe hue phuul aur tire lams kī ḳhushbū
sadma tire jaane kā bhulāne nahīñ dete

phuul ko dhuul kī zarūrat hai
is qadar dekh-bhāl Thiik nahīñ

ik sadā sañg meñ taḌpī hogī
ik sharar phuul meñ larzā hogā