Tags-Phool

savāl-e-ruḳh gulistāñ meñ aayā to phuul Thahrā
laboñ kī hasrat suḳhan meñ pahuñchī to pañkhuḌī thī

ik daaġh ban ke dil meñ sulagtā hai ai 'salām'
vo phuul jis kā lams nahīñ apne bhaag meñ

aaj phir dard-o-ġham ke dhāge meñ
ham piro kar tire ḳhayāl ke phuul

phuul se ma.asūm bachchoñ kī zabāñ ho jā.eñge
miT bhī jā.eñge to ham ik dāstāñ ho jā.eñge

lahū ro ke sīñchā hai ham ne chaman ko
har ik phuul kā mājrā jānte haiñ

kuchh phuul shagufta mire hoñToñ pe saje haiñ
ā.īna mujhe dekh ke hairāñ bhī nahīñ thā

baat to jab hai ki mamnūn-e-bahārāñ hoñ sabhī
phuul to phuul haiñ kāñToñ ko bhī nuz.hat dī jaa.e

ġhuncha hī phuul ban kar jān-e-chaman huā hai
maiñ ne yaqīñ kī daulat paa.ī hai husn-e-zan se

ho nashāt-e-dil ki malāl-e-dil hameñ pesh karnā jamāl-e-dil
kabhī hañs ke phuul khilā liye kabhī roke motī piro liye

vo hañsī dil meñ ghanTiyāñ sī haiñ
devtāoñ ne phuul barsā.e

saroñ ke phuul kī bārish na tham sakī āḳhir
umaDte daar kā sāvan mire nagar meñ thā

phuul bikhrātā huā maiñ tau chalā jā.ūñgā
aap kāñTe mirī rāhoñ meñ bichhāte rahiye

har baras rañg pe aatā hī gayā ye gulzār
phuul tahzīb ke khilte ga.e miTte ga.e ḳhaar

ab numū pā.eñge diloñ ke zaḳhm
ham ne ik phuul shāḳh par dekhā

kahīñ mauj numū rukī to nahīñ
shāḳh se phuul toḌ kar dekhā

khule haiñ phuul har-sū jaise koī
tirā sadqa utāre de rahā hai

phuul apne vasf sunte haiñ us ḳhush-nasīb se
kyā phuul jhaḌte haiñ dahan-e-andalīb se

aisā ḳhush-rañg phuul hai ik tū
terā saanī nā gulistāñ se mile

bajā ki phuul kī do roza zindagī hogī
kalī se koī ye pūchhe kalī kahāñ tak hai

dil ke jalte hue zaḳhmoñ kā mudāvā ban kar
phuul mahke haiñ tire haath kā saaya ban kar