Tags-Phool

har gaam pe kuchh phuul chune jaate ho 'jauhar'
ye shauq kahīñ baaġh ko sahrā na banā de

bad-baḳht huuñ jaate hue Dartā huuñ chaman meñ
qismat kahīñ har phuul ko kāñTā na banā de

vaz.a-dārī-e-mohabbat ke munāfī hai to ho
aaj collar pe nayā phuul sajāyā jaa.e

hazār phuul liye mausam-e-bahār aa.e
jo dil ho suukh ke kāñTā to kyā qarār aa.e

ruteñ badlīñ na.e phal-phūl aa.e
magar dil sab purānā chāhtā hai

chaman meñ kis ne dil ḳhālī kiyā hai
lahū se jo bhare haiñ phuul saare

ik kalī khil ke phuul meñ badlī
ek bhañvrā bhī phuul par aayā

patjhaḌ kā mausam thā lekin shāḳh pe tanhā phuul khilā thā
jis ko ham patthar samjhe the chashme jaisā phuuT bahā thā

khil ke raheñge dekhnā chār-sū raushnī ke phuul
raat ke dasht kī taraf naqsh-gar-e-sahar ga.e

lipTe rahe tamām raat phuul kī pattiyoñ ke saath
dhuup paḌī jo phuul par qatre farār kar ga.e

jis ne ḳhizāñ ko bhejā hai us ke paas bahār bhī hai
jis ne baaġh ujāḌā hai vo ḳhud phuul khilā.egā

jaane kis rut meñ khileñge yahāñ ta.abīr ke phuul
sochtā rahtā huuñ ab ḳhvāb ugātā huā maiñ

phuul vo hai jo mayassar chaḌhe ye suntā thā
ab khulā dil kī rah-e-ishq meñ qurbānī de

jahāñ jahāñ se bhī guzre hujūm-e-mātam meñ
shagufta phuul se chehre qazā pe vaare ga.e

chāhtā hai dil kisī se raaz kī bāteñ kare
phuul aadhī raat kā āñgan meñ hai mahkā huā

kaun bachā.egā phir toḌne vāloñ se
phuul agar shāḳhoñ se dhokā khāte haiñ

ḳhushbū apne raste ḳhud tai kartī hai
phuul to Daalī ke ho kar rah jaate haiñ

aap ab aa.e haiñ fasl-e-gul ke ba.ad
phuul jab ummīd ke murjhā ga.e

ho gul bulbul tabhī bulbul pe bulbul phuul kar gul ho
tire gar gul-badan bar meñ qabā-e-chashm-e-bulbul ho

har sub.h chheḌtī haiñ havāoñ kī uñgliyāñ
poshīda ek phuul jo nannhī kalī meñ hai