Tags-Phool

sadiyoñ meñ chand phuul khile aur samar bane
lamhoñ meñ āñdhiyoñ ke thapeḌoñ se mar ga.e

ḳhvāhishoñ ke phuul murjhāne lage
phir mirī ye hichkiyāñ baḌhtī ga.iiñ

dhuup meñ jhulsī huī shāḳh pe afsurda kalī
phuul banñe ke liye dast-e-sabā māñge hai

mizha ke ashk tamannā ke zaḳhm yaad ke phuul
ka.ī charāġh sar-e-shām-e-intizār mile

aise khilā vo phuul sā chehra phailī saare ghar ḳhushbū
ḳhat ko chhupā kar paḌhne vaalī raaz chhupānā bhuul ga.ī

sab ko phuul aur kaliyāñ bāñTo ham ko do sūkhe patte
ye kaise tohfe laa.e ho ye kyā barg-faroshī hai

niiñd āñkhoñ se uḌī phuul se ḳhushbū kī tarah
jī bahal jā.egā shab se tire gesū kī tarah

dosto jashn manāo ki bahār aa.ī hai
phuul girte haiñ har ik shāḳh se aañsū kī tarah

phuul jab koī bikhartā hai to hañs dete haiñ
dard jab had se guzartā hai to hañs dete haiñ

phuul ke jism pe titlī kā lahū hai 'fānī'
kyā mire ahd kī tasvīr huī jaatī hai

chhūT jaatī hai phuul se ḳhushbū
ruuTh jaate haiñ yaar chup ho jā

roz ik baaġh guzartā hai isī raste se
roz kashkol meñ ik phuul dharā hotā hai

yūñhī to nahīñ dasht meñ pahuñche yūñhī to nahīñ jog liyā
bastī bastī kāñTe dekhe jañgal jañgal phuul miyāñ

dil kā har zaḳhm tirī yaad kā ik phuul bane
mere pairāhan-e-jāñ se tirī ḳhushbū aa.e

phuul dekhā hai ki dekhā hai chaman
husn se husn-e-nazar khultā hai

ek banphūl thā is shahr meñ vo bhī na rahā
koī ab kis ke liye lauT ke aanā chāhe

ye aur baat ki dāman ko phuul de na sakī
magar bahār ne talvoñ ko ḳhaar de to diyā

lāDle kanchoñ sī umreñ
tāliyoñ kī phūl-jhaḌiyoñ meñ bikhar kar TūTtī haiñ

bharī bahār meñ dekhe jo phuul jalte hue
ruke na ashkoñ ke dariyā mirī ghaTāoñ meñ

qarya-e-jāñ meñ koī phuul khilāne aa.e
vo mire dil pe nayā zaḳhm lagāne aa.e