Tags-Phool

yuuñ to khile haiñ phuul ka.ī rañg ke magar
phīke paḌe haiñ donoñ jahāñ aap ke binā

'iqbāl' jab se phuul haiñ gul-dān ke asiir
ḳhushbū uḌī uḌī sī hai aur rañg zard haiñ

phuul kyā kyā khilātī jaatī hai
koī shāḳh-e-gumān hāthoñ meñ

girte jaate haiñ phuul bistar par
khultā jaatā hai thaan hāthoñ meñ

har ik phuul gulshan meñ ye kah rahā hai har ik jām-e-mai se ye ham sun rahe haiñ
zamāne kī nazroñ meñ ghar hai usī kā jo hañs hañs ke din zindagī ke guzāre

sairābī ke is rele ne luk-chhup kaisī raas rachā.ī
hāthoñ baiTh vo barkhā chehra phuul surekhā khil uThā hai

us ke haath meñ phuul hai mat kahiye kahiye
us kā haath hai phuul ko phuul banāne meñ

kāñTā hai vo ki jis ne chaman ko lahū diyā
ḳhūn-e-bahār jis ne piyā hai vo phuul hai

nasīm-e-yād-e-ġhazālāñ chalī na phuul khile
vo regzār mile mausam-e-javānī ko

ham apne hamrāh zinda lafzoñ ke phuul le kar
har ek dāman kī dhajjiyoñ kī dhanak meñ

vo to ḳhvāboñ meñ bhī ḳhushbū kī tarah aatā rahā
phuul kī mānind us ko ham magar dekhā kiye

har phuul ke siine meñ gul-e-sañg ho 'sājid'
har sañg meñ ik rañg-e-qalaq chāhiye mujh ko

jaise bāloñ meñ koī phuul chunā kartā hai
ghar ke gul-dān meñ phūloñ sā sajā leñ tum ko

to kyā mujhe tum jalā hī logī gale se apne lagā hī logī
jo phuul juuḌe se gir paḌā hai taḌap ke us ko uThā hī logī

is ḳhaak pe bikhrā hai ik phuul hamārā bhī
jab bād-e-sabā aa.e kuchh der yahāñ Thahre

phuul meñ rañgat bhī thī ḳhushbū bhī thī aur husn bhī
us ne āvāzeñ to diiñ lekin kahāñ maiñ sun sakā

qurbat ke hasīñ phuul mirī ruuh pe vaare
kyā ḳhuub saḳhī hai ye saḳhāvat bhī ajab hai

phuul barse haiñ ba.ad marg un par
shaġhl karte rahe jo ḳhāroñ se

phir bo rahā huuñ aaj unhīñ sāhiloñ pe phuul
phir jaise mauj meñ ye samundar na aa.egā

badlā jo us kī aañkh kā andāz to khulā
karte haiñ rañg phuul se parvāz kis tarah