Tags-Phool

lau detī hai tasvīr nihāñ-ḳhāna-e-dil meñ
lāzim nahīñ is phuul kā poshāk pe honā

surḳhi-e-shām ne yuuñ phuul bikhere dil meñ
jaise chupke se utar aa.e savere dil meñ

jab khile phuul chaman meñ to tirī yaad aa.ī
chand aañsū bhī masarrat ke bahāne nikle

tujh ko rakhtī huuñ apnī sochoñ meñ
phuul khilte haiñ kitne rastoñ meñ

nāzukī meñ safā meñ bū meñ vo jism
phuul hai aa.ina hai sandal hai

na hijr hai na vasl hai ab is ko koī kyā kahe
ki phuul shāḳh par to hai magar khilā nahīñ rahā

mujhe navāz dī maulā ne phuul sī beTī
mire hisāb meñ kuchh nekiyāñ nikal aa.iiñ

husn yuuñ ishq se nārāz hai ab
phuul ḳhushbū se ḳhafā ho jaise

dil ke vīrāne meñ kuchh phuul tamannā ke khile
ham bujhe log tire baaġh meñ aa jā ke khile

maiñ apne baap ke siine se phuul chuntā huuñ
so jab bhī saañs thamī baaġh meñ Tahal aayā

phuul to saare jhaḌ ga.e lekin
terī yaad kā zaḳhm harā hai

sūraj ugā to phuul sā mahkā hai kaun kaun
ab dekhnā yahī hai ki jaagā hai kaun kaun

rañg kī aañch meñ jaltā huā ḳhushbū kā badan
aañkh us phuul kī tasvīr meñ kyā kyā dekhe

aariz ke qarīn gulāb kā phuul
ham-rañg kī duun ho ga.ī hai

garm do-pahroñ meñ jalte sehnoñ meñ jhāḌū dete the
jin būḌhe hāthoñ se pak kar roTī phuul meñ Dhaltī thī

musāfir-e-ḳhvāb ke liye haiñ ye merī āñkhoñ ke phuul 'sājid'
aur ik sitāre ke dekhne ko ye aag utrī hai sham.a-dāñ se

tum na kaho tārīḳh kahegī ham haiñ kis me.aar ke log
patthar khaa.e phuul tarāshe rāhoñ ko hamvār kiyā

kis aahaT kī bahār se pag pag dhuul ke phuul khile
kis mausam ne Thokar khaa.ī ham majbūroñ se

ashkoñ ke phuul le ke maiñ niklā to huuñ 'ra.īs'
ye dekhnā hai un kā ḳharīdār kaun hai

ye Dher nahīñ hai miTTī kā ik 'sālik' thak kar soyā hai
kuchh os girā do palkoñ se kuchh phuul yahāñ lahrā jaa.eñ