Tags-Phool

chaman ke shaidā.iyoñ se ik din savāl ye pūchhnā hai mujh ko
khilā jo pur-ḳhār jañgaloñ meñ vo phuul kyuuñ mo'atabar nahīñ hai

chaman ko auroñ ne likkhā hai mai-kada bar dosh
maiñ phuul phuul ko ātish-ba-jām likhtā huuñ

sone kī tashtarī meñ sajā kar na phuul bhej
ye khel mujh ġharīb se dekhā na jā.egā

dil meñ zaḳhmoñ kī na.ī fasl ugāne nikle
dard ke phuul bayābāñ meñ khilāne nikle

ai mere majrūh tabassum rūp-nagar kī riit na pūchh
jin ke sīnoñ meñ patthar haiñ un par phuul baraste haiñ

shabnamī haath baḌhā.ūñ ki khule darvāza
bin khile phuul ke zindāñ meñ huuñ ḳhushbū kī tarah

mujh ko supurd-e-ḳhāk karo is duā ke saath
āñgan meñ phuul khilte raheñ aur makāñ rahe

dhuāñ dhanak huā añgār phuul bante ga.e
tumhāre haath bhī kyā mo.ajaze dikhāne lage

fasl-e-gul aisī ki arzāñ ho ga.e kāġhaz ke phuul
ab koī gul-pairahan zarrīñ-qabā miltā nahīñ

sehn-e-gulshan meñ tarab-ḳhez bahār aate hī
ham ne har phuul ko paimāna banā kar chhoḌā

har saal bahār se pahle maiñ paanī par phuul banātā huuñ
phir chāroñ mausam likh jaate haiñ naam tumhārā āñkhoñ meñ

gahrā sukūt zehn ko behāl kar gayā
sochoñ ke phuul phuul ko pāmāl kar gayā

aaj vo phuul chaḌhā.eñge mirī turbat par
rashk-e-gulzār-e-jināñ marqad-e-vīrāñ hogā

ga.ī rutoñ kā ta.alluq bhī jān-levā thā
bahut se phuul na.e mausamoñ meñ marne lage

phuul sī chiḌiyā zamīñ par kyā girī
zehn meñ raqsāñ gumāñ haiñ aur maiñ

ghar ke gul-dānoñ meñ 'shāhid' phuul hoñge kāġhzī
aur pardoñ par ''printed'' titliyāñ rah jā.eñgī

phuul to do din bahār-e-jāñ-fazā dikhlā ga.e
hasrat un ġhunchoñ pe hai jo bin khile murjhā ga.e

mujh ko har phuul sunātā thā fasāna terā
tere dāman kī qasam apne garebāñ kī qasam

ab tak hai mere hāthoñ meñ ḳhushbū rachī huī
maslūb ho ke phuul bahut baas de gayā

hazār baar mire dil kā phuul murjhāyā
hazār baar luTā mere dil kā sarmāya