Tags-Phool

aa bhī jā tū ki dil ke gulshan meñ
phuul ḳhushbū bahār chāhtā huuñ

is doshīza miTTī par naqsh-e-kaf-e-pā koī bhī nahīñ
jhaḌte phuul barastī bārish tez havā koī bhī nahīñ

ye phuul ḳhushbū ye chāñd-tāre ye girtī būñdeñ ye abr-pāre
sab us kī aamad ke muntazir haiñ vo ḳhud ko sabse chhupā rahī hai

ahl-e-junūñ ko ab ke bhī izn-e-junūñ milā nahīñ
ab ke baras bhī baaġh meñ phuul koī khilā nahīñ

ye shabnam phuul taare chāñdnī meñ aks kis kā hai
sunahrī dhuup chhāñv raushnī meñ aks kis kā hai

fazāoñ meñ mahak jalne kī bū phailī huī hai
kisī ne phuul ātish-dān par rakkhe hue haiñ

vahdat hī se zuhūr hai kasrat kā dekh le
haiñ phuul sau tarah ke va-lekin hai baaġh ek

chaman se nikle haiñ ik phuul toḌ kar ham bhī
lahūluhān se hāthoñ meñ hai gulāb koī

talāshte rahe kāñToñ meñ phuul se paikar
mizāj ham ko azal se hī āshiqāna milā

tum ko achchhe lage to tum rakh lo
phuul toḌe the bechne ke liye

dil koī phuul nahīñ hai ki agar toḌ diyā
shāḳh par is se bhī khil jā.egā achchhā koī

husn kī sañgat phuul kī rañgat se mas ho kar
shabnam kā aañsū āveza ho jaatā hai

khilte haiñ dil meñ phuul tirī yaad ke tufail
ātish-kada to der huī sard ho gayā

tumhārī raah meñ shāḳhoñ pe phuul suukh ga.e
kabhī havā kī tarah is taraf bhī ho lete

patthar meñ fan ke phuul khilā kar chalā gayā
kaise amiT nuqūsh koī chhoḌtā gayā

phūñk saktī hai barq gulshan ko
phuul is meñ khilā nahīñ saktī

tū chaman hai aur tirī raftār hai mauj-e-nasīm
ḳhāmushī ġhuncha hañsī hai phuul khil jaane kā naam

ishq hai dariyā-e-ātish tair kar jaane kā naam
husn hai sehn-e-chaman meñ phuul barsāne kā naam

ye ġham ke phuul haiñ yā sher dekhiye aur bas
hameñ pata hai ki ham ne nikhāre jaise haiñ

tilism-e-chashm salāmat rahe ki jis ke sabab
kahīñ haiñ phuul kahīñ ham sitāre jaise haiñ