Tags-Phool

phuul pī pī kar mukaddar ho rahā hai vo sabīh
dekh lo naḳhl-e-saman meñ gul hai gul meñ ḳhaak hai

bāloñ meñ chhup kar kiran phuul un kā miTTī ho gayā
afa.ī-e-gesū ke phan meñ gul hai gul meñ ḳhaak hai

sāgaroñ kī phuul piine se huī miTTī ḳharāb
jām-e-mai bāġh-e-suḳhan meñ gul hai gul meñ ḳhaak hai

parde meñ hai phuul sā muñh aur muñh pe gard-e-ḳhat
is sahar ke pairahan meñ gul hai gul meñ ḳhaak hai

likhā thā ek taḳhtī par koī bhī phuul mat toḌe magar āñdhī to an-paḌh thī
so jab vo baaġh se guzrī koī ukhḌā koī TuuTā ḳhizāñ ke āḳhirī din the

jin logoñ ne un kī talab meñ sahrāoñ kī dhuul uḌaa.ī
ab ye hasīñ un kī qabroñ par phuul chaḌhāne aa jaate haiñ

tanhā.iyoñ ke dasht meñ kuchh phuul se khile
raqsāñ shab-e-firāq koī chāndnī rahī

laboñ pe phuul mohabbat ke jo sajā legā
use harīf bhī baḌh kar gale lagā legā

yuuñ to saarā chaman hamārā hai
phuul jitne bhī haiñ parā.e haiñ

champa.ī dhuup meñ har zarra hai sūraj kī kiran
chāñdnī raat meñ har phuul hai raushan raushan

joban par in dinoñ hai bahār-e-nashāt-e-bāġh
letā hai phuul bhar ke yahāñ jholiyāñ basant

dil-e-fasurda kī bātoñ pe ye tabassum-e-nāz
kalī ko phuul banānā sikhā rahā hai koī

is tarah murjhā ga.e kuchh phūl-chehre raat ko
dhuup āñgan meñ utar aa.ī ho jaise raat ko

dushman se kah rahā huuñ tirī anjuman kā raaz
yā phuul rakh rahā huuñ maiñ sho.ale ke haat par

maqtal kī zamīñ se phuul ugeñ
jaatā hai kahīñ miTTī kā asar

toḌā nahīñ hai shāḳh se ḳhush thī bakāolī
ham le ke us ke phuul kī tasvīr chal paḌe

is gulistāñ kī yahī riit hai ai shāḳh-e-gul
tū ne jis phuul ko paalā vo parāyā hogā

ye mauj-e-havā yūñhī itrātī nahīñ phirtī
us phuul se mil aa.ī ḳhushbū bhī churā laa.ī

ai dil tujhe badaltī huī rut se kyā milā
paudoñ meñ phuul aur daraḳhtoñ meñ phal paḌe

āñkhoñ meñ aa gayā hai mirī bhī zarā sā daaġh
phuul us ke pairahan meñ bahut der tak rahā