Tags-Phool

chāñd taare to mire bas meñ nahīñ haiñ 'āzar'
phuul laayā huuñ mirā haath kahāñ tak jaatā

kaisā khilā hai phuul jab aayā bahār par
pūchhe to koī lutf-e-javānī javān se

lagtī hai qaus-e-quzah aariz pe shabnam
barg-e-gul jaise haiñ vo lab phuul kahiye

aap bhī us husn ko ab phuul kahiye
dekhiye nāzuk badan sab phuul kahiye

haath meñ us ke 'azal' ne de diyā gul
faisla kariye kise ab phuul kahiye

rāt-rānī ban vo aa.e ḳhvāb meñ phir
mahkī in sāñsoñ ko har shab phuul kahiye

baat merī aap ab bhī jo na maane
titlī jab chūme use tab phuul kahiye

phuul se hī hotī hai tamsīl us kī
rashk kartā hai chaman jab phuul kahiye

bahāroñ kī nazar meñ phuul aur kāñTe barābar haiñ
mohabbat kyā kareñge dost dushman dekhne vaale

man.a kar girya-e-shabnam pe na ye phuul hañseñ
laale paḌ jā.eñge ai bād-e-sabā jānoñ ke

gulshan meñ bahār aa.e ki ḳhizāñ murjhā.e kalī yā phuul khileñ
sayyād tujhe kyā matlab hai tū ashk gine jā bulbul ke

husn-e-ḳhirām-e-nāz se jaadū na.e jagā.e jā
jab bhī jahāñ paḌeñ qadam phuul vahīñ khilā.e jā

lafzoñ kī sañglāḳh siloñ meñ samo diyā
yāroñ ne fan ke phuul ko patthar meñ bo diyā

vo shaḳhs zindagī kī bulandī na chhū sakā
vo jis kā saañs phuul gayā ho chaḌhāv par

phuul se merī yahī ġham-ḳhvāriyāñ
ik gulistāñ meñ hazāroñ kyāriyāñ

na bhuul kar bhī tamannā-e-rañg-o-bū karte
chaman ke phuul agar terī aarzū karte

kahte haiñ in shāḳhoñ par phal phuul bhī aate the
ab to patte jhaḌte haiñ yā patthar girte haiñ

koī phuul ḳhushbū se chuur sā koī rañg halqa-e-nūr sā
koī husn ġhairat-e-hūr sā tire naam saarā likhā huā

jis phuul kī har pañkhuḌī hotī hai motī kī laḌī
us phuul kī ḳhātir kabhī aañsū bahā.eñ kis tarah

ye phuul patte chāñdnī ye sūrateñ man-mohnī
aise meñ apnī jāñkanī un se chhupā.eñ kis tarah