Tags-Phool

jamāl-e-sehn-e-gulistāñ hamīñ se qaa.em hai
hamāre ḳhuun se har phuul ḳhush-libās huā

kabhī phūlā na phulā naḳhl-e-tamannā afsos
phuul kī shakl na dekhī na samar kī sūrat

diida o dil meñ tire aks kī tashkīl se ham
dhuul se phuul hue rañg se tasvīr hue

phuul meñ maujūd rahne se hai ḳhushbū kā vaqār
phuul meñ ḳhushbū nahīñ hogī to kyā rah jā.egā

ajiib dasht hai is meñ na koī phuul na ḳhaar
kahāñ pe aa gayā maiñ titliyāñ pakaḌte hue

ye soch ke tere qadmoñ kī kuchh ḳhaak uḌā dī gulshan meñ
har phuul meñ tere chehre kī thoḌī sī jhalak aa jā.egī

us ke dam se kahe sher maiñ ne 'hilāl'
phuul is dhuup meñ jo khilā rah gayā

vo to ḳhush-bū hai havāoñ meñ bikhar jā.egā
mas.ala phuul kā hai phuul kidhar jā.egā

kam raushan ik ḳhvāb ā.īna ik piilā murjhāyā phuul
pas-manzar ke sannāTe meñ ek nadī pathrīlī sī

kis ko ḳhabar maiñ kis raste kī dhuul banūñ yā phuul banūñ
kyā jaane kyā rañg dikhā.e us kī aañkh pahelī sī

sameT lā to bahāreñ mire liye bhī mahak
ye phuul ḳhushbū kabhī sab mire bhī naam to kar

barsoñ hī us ne phuul khilā.e haiñ dhuup meñ
ik umr ho chalī hai jise baam par ga.e

kiran phuul kī pattiyoñ meñ dabī
hañsī us ke hoñToñ pe aa.ī huī

bharī dopahar kā khilā phuul hai
pasīne meñ laḌkī nahā.ī huī

khaTke haiñ tire saare gulistāñ kī nazar meñ
sab apnī jagah phuul the ik ḳhaar hamīñ the

vo surḳh phuul kitāboñ meñ dekh rotā rahā
jise bhī qisse sunā.e haiñ zard beloñ ke

ek kāñTe se phuul ne bolā
shukriya tum mujhe bachāte ho

chaman se phuul ke dhoke meñ chun liye sho.ale
kaf-e-vafā ke liye dāman-e-talab ke liye

asar-āfrīn-e-bahār hai tirī fikr 'shā.ir'-e-ḳhush-navā
jinheñ chhū sake na ḳhizāñ kabhī vahī phuul le ke ġhazal ke aa