Tags-Qismat

hamāre ghar kī hī qismat buland thī shāyad
vagarna aap kahāñ aur hamārā baab kahāñ

takiye meñ kyā rakhā hai ḳhat-e-ġhair kī tarah
dekhūñ to maiñ navishta-e-qismat mirā na ho

maut hī aap ke bīmār kī qismat meñ na thī
varna kab zahr kā mumkin thā davā ho jaanā

dilā palaT gayā qismat kā pahle hī paasā
ab apnī jiit kahāñ dil jab apnā haar aayā

ik ma.ani-e-be-lafz hai andesha-e-fardā
jaise ḳhat-e-qismat ki paḌhā bhī nahīñ jaatā

muntazir kaun se maiñ ālam-e-asbāb kā huuñ
kyā hai ab qismat-e-ḳhāshāk nahīñ khultā kuchh

aap dāman ko sitāroñ se sajā.e rakhiye
merī qismat meñ to patthar ke sivā kuchh bhī nahīñ

tujh se bichhaḌnā qismat meñ thā jiinā to majbūrī hai
soch rahā huuñ ujḌe ghar kī phir se na.ī tāzīm karūñ

har choT kā hāsil haiñ bilakte hue aañsū
ye dard ye ġham qismat-e-insāñ to nahīñ hai

jis pe rakhnā thī mujhe apnī asās-e-hastī
apnī qismat meñ 'munavār' vahī ik pal na huā

kār-ḳhāne se junūñ ke bhī maiñ uryāñ niklā
merī qismat kā na ek-ādh garebāñ niklā

bahut mumkin hai qismat muntazir ho
to phir ḳhvāboñ meñ bhī bedār jaanā

'farhat' kā patā pūchhe jo koī kaafī hai faqat ye kaafī hai
phūTī huī qismat TuuTā dil ab aur nishānī kyā kahiye

ḳhushā ai dil mudāvā un ke zaḳhmoñ kā nahīñ varna
kahāñ har zaḳhm kī qismat meñ hai nāsūr ho jaanā

bevafā logoñ meñ rahnā tirī qismat hī sahī
in meñ shāmil maiñ tirā naam na hone dūñgā

umr bhar kī qismat kab itnā to Thahar jaatā
jitnā ek muflis ke ghar charāġh jaltā hai

ye jo insāñ ḳhudā kā hai shahkār
us kī qismat pe hai ḳhudā kī maar

mahrūmī-e-qismat hai mirī ḳhaas vagarna
mash.hūr-e-jahāñ hai karam-e-ām tumhārā

tirā milnā bahut mushkil hai lekin
maiñ qismat āzmānā chāhtī huuñ

shaiḳh ko de do mai-e-be-rañg-o-bū
us kī qismat se khīñchī achchhī nahīñ