Tags-Qismat

fasl-e-gul dekh ke afzūñ huī vahshat apnī
le chale dekhiye kis jā mujhe qismat apnī

jaam miinā baada saaqī thā ye sab 'nāzim' vahāñ
par mirī qismat ki ḳhālī merī jā thī maiñ na thā

vā-e-qismat DhūñDtī thī kal mujhe shamshīr-e-yār
rahmat-e-ām us kī sar-garm-e-atā thī maiñ na thā

yaar ko madd-e-nazar mashq-e-jafā thī maiñ na thā
vaa.e qismat kal vahāñ merī qazā thī maiñ na thā

jī jalā kar ek bosa māñgte haiñ baar se
aage yā qismat vo dekheñ haañ kare hai yā nahīñ

kaise vo talḳh-tar haiñ mire shor-e-ishq se
qismat se apnā chāhne meñ bhī mazā nahīñ

chashm-e-pur-ḳhūn-e-vafā lāla-nishāñ hai ki jo thī
qismat-e-bul-havasāñ aish-e-jahāñ hai ki jo thā

maiñ dīvāna sahī lekin vo ḳhush-qismat huuñ ai 'mahshar'
ki duniyā kī zabāñ par aa gayā hai aaj naam apnā

kaun in kaliyoñ kī qismat pe na ro.e 'ḳhātir'
jin ko kar detī hai taqdīr javāñ rātoñ-rāt

jī meñ aatā hai ki dekhūñ kabhī sar phoḌ ke maiñ
vasl un kā mirī qismat meñ likhā hai ki nahīñ

āsmāñ sub.h ke āsār se pahle pahle
merī qismat ke sitāre mujhe vāpas kar de

zamāna muḳhālif thā qismat ḳharāb
'muzaffar' yahāñ kuchh bhī thā Thiik na.iiñ

ye ajiib mājrā hai ki ḳhadyau-e-haft-qulzūm
taraf-e-sarāb dauḌe pai-e-qismat-āzmā.ī

hañste phuul kahāñ haiñ merī qismat meñ
maiñ to bas murjhā.ī kaliyāñ chuntā huuñ

apnī qismat meñ bhī kyā likkhā hai 'atīq'
bāñhoñ kī vaadī meñ utarnā so jaanā

ġham ham ne ḳhushī se mol liyā us par bhī huī ye nādānī
jab dil kī umīdeñ TuuT ga.iiñ qismat se shikāyat kar baiThe

ham sahte rahe zulm aur jafā ye soch ke muñh se kuchh na kahā
Taltā hai kahīñ qismat kā likhā phir un se shikāyat kyā karte

ab tak to jo qismat ne dikhāyā vahī dekhā
ā.inda ho kyā nafā o zarar dekh rahe haiñ

ham aib samajhte haiñ har ik apne hunar ko
kyā kījiye majbūr haiñ qismat nahīñ achchhī

fitrat merī ishq-o-mohabbat qismat merī tanhā.ī
kahne kī naubat hī na aa.ī ham bhī kisū ke ho leñ haiñ