Tags-Qismat

harf nahīñ jāñ-baḳhshī meñ us kī ḳhūbī apnī qismat kī
ham se jo pahle kah bhejā so marne kā paiġhām kiyā

mirī qismat meñ vasl us kā agar ai āsmāñ hotā
to tū bhī mehrbāñ hotā ḳhudā bhī mehrbāñ hotā

maidāñ kī haar jiit to qismat kī baat hai
TuuTī hai kis ke haath meñ talvār dekhnā

añgūr hī meñ utrā qismat kā āb-o-dāna
maiñ thā isī kā pyāsā maiñ thā isī kā bhūkā

pīpal ke pattoñ ke saa.e kab tak tumheñ sarāheñge
ek na ik din qismat jaag uThegī rāh-guzāroñ kī

ai safī' vo bigaḌ ga.e man kar
terī qismat ko kyā kare koī

yuuñ to maqdūr nahīñ tujh ko tirī qismat par
haañ magar tū ne ka.ī sikke uchhāle hoñge

maiñ samundar huuñ magar pyaas hai qismat merī
mere dāman meñ agar 'ashk' guhar hai kyuuñ hai

ḳhush-qismat haiñ vo jo gaañv meñ lambī taan ke sote haiñ
ham to shahr ke shor meñ shab-bhar apnī jaan ko rote haiñ

imtihāñ se maiñ nahīñ ghabrātā
fail honā mirī qismat hī sahī

bargasht-agī-e-qismat ye chheḌ kyā nikālī
jo mudda.ā-e-dil ho vo mudda.ī-e-jāñ ho

ham bhī tañg aa hī ga.e āḳhir niyāz o naaz se
haañ ḳhushā qismat ki un kī mehrbānī ho chukī

jis kī qismat hai begharī 'manzar'
un ko to apne sā.ebān meñ rakh

bulbul ko bāġhbāñ se na sayyād se gila
qismat meñ qaid likkhī thī fasl-e-bahār meñ

jī ko samjhātā huuñ qismat meñ likhā thā so huā
kuchh sambhal kar bhī bahāne pe na pahuñchā āḳhir

qismat hai saath agar to duā bhī hai pur-asar
varna kiye haiñ ham ne bhī sajde kahāñ kahāñ

hāsil kisī se kuchh nahīñ hotā sivā-e-rañj
duniyā meñ laa.ī hai hameñ qismat barā-e-rañj

mirī āñkhoñ ne vo aañsū bhī dekhā
mirī qismat meñ jo likkhā nahīñ thā

apnā thā ḳhalvatoñ meñ kabhī partav-e-jamāl
qismat meñ ab to sāya-e-dīvār bhī nahīñ

dard-o-ġham ko bhī hai nasība shart
ye bhī qismat sivā nahīñ miltā