Tags-Qismat

yaar tū yaar nahīñ baḳht haiñ so ulTe haiñ
kab talak ham ye saheñ dard-o-alam yā qismat

chhaTegī kaise 'muzaffar' siyāhī qismat kī
nikal to aa.egā ḳhurshīd raat Dhalne se

maze luuTo kalīm ab ban paḌī hai
baḌī ūñchī jagah qismat laḌī hai

bāda-e-nāb qismat-e-aġhyār
'sāqī'-e-zār ko mile talchhaT

nādāñ ho jo kahte ho ki kyuuñ jiite haiñ 'ġhālib'
qismat meñ hai marne kī tamannā koī din aur

aadmī kī qismat bhī āgahī kī qismat bhī
ibtidā añdhere se intihā añdhere meñ

hijr kā aish kahāñ hai mirī qismat meñ ki ab
zindagī rañj ba-andāz-e-digar khīñchtī hai

be-tābiyāñ sameT ke pūchhā kare hai dil
qismat meñ apnī sub.h kā taarā to hai abhī

'mīrā-jī' kyuuñ soch satā.e palak palak Dorī lahrā.e
qismat jo bhī rañg dikhā.e apne dil meñ samonā hogā

ai 'qamar' vo na huī dekhiye taqdīr kī baat
chāndnī raat jo qismat se kabhī aa.ī bhī

maiñ gila qismat kā kartā thā to sote the nasīb
shikva-e-taqdīr bahr-e-ḳhvāb baḳht afsāna thā

qismat to dekh kholī girah kuchh to rah ga.e
nāḳhun hamāre TuuT ke band-e-naqāb meñ

itnā bhī na saaqī hosh rahā pī kar ye hameñ mai-ḳhāna thā
gardish meñ hamārī qismat thī chakkar meñ tirā paimāna thā

roz vo ḳhvāb meñ aate haiñ gale milne ko
maiñ jo sotā huuñ to jaag uThtī hai qismat merī

gumbad-e-shab meñ mah-o-najm sajāne vaale
un galī kūchoñ kī qismat meñ darīcha likh de

soī huī qismat ko jagātā huā naġhma
har saañs ko hañgāma banātā huā naġhma

matlab kā zamāna hai 'nādir' koī kyā degā
mujh soḳhta-e-qismat ko degā to ḳhudā degā

ek ik lamha guzārā jā rahā hai hosh meñ
ai zahe-qismat jo haiñ tūfān kī āġhosh meñ

log qismat pe chhoḌ dete haiñ
baat bantī nahīñ hai jab kuchh bhī

zahe-qismat hilāl-e-eid kī sūrat nazar aa.ī
jo the ramzān ke bīmār un sab ne shifā paa.ī