Tags-Raaz

use chhupāo kushtagāñ ke dil meñ raaz kī tarah
ye teġh-e-ābdār āstīn ke liye nahīñ

dil ke pardoñ meñ chhupāyā hai tire ishq kā raaz
ḳhalvat-e-dil meñ bhī pardā nazar aatā hai mujhe

shukr-e-ḳhudā phirā hai mirā nāma-bar shitāb
aa kaan meñ kahe hai ka.ī rāz-e-dil-fareb

raaz miTTī meñ hai koī shāyad
dhuup meñ peḌ jal nahīñ sakta

kyuuñ 'josh' rāz-e-dost kī kartā hai justujū
kah do koī ki shaah kā haal ai gadā na pūchh

kyā kah ke phuul bantī haiñ kaliyāñ gulāb kī
ye raaz mujh se bulbul-e-shīrīñ-navā na pūchh

muddat ho ga.ī sāz-e-mohabbat khol de ab ye raaz
vo merī āvāz haiñ bāñhoñ meñ un kī āvāz

chashm pur nam ne kiyā ifshā raaz
ābrū-e-zabt ġhārat ho ga.ī

ā.īna jab dikhāyā to ye raaz bhī khulā
jitnā bhī jo buland thā utnā hī past thā

aayā shu.ūr-e-zīst to ifshā huā ye raaz
tere kalām-e-fan kī maiñ pahlī shikast thā

fikr-e-ifshā-e-rāz kyuuñ na karūñ
kyā hayā-ḳhez hai nazar dekho

jagah jo āñkhoñ meñ maiñ ne dī thī to un se thī chashm-e-rāz-dārī
ye kyā ḳhabar thī ki ashk mere mujhī ko be-ābrū kareñge

hamārī ibtidā miTTī meñ ik raaz
hamāre vāste anjām ubhre

rāz-e-ulfat dil meñ rakhne kī qasam khaa.ī magar
jab havā badlī to vo nok-e-zabāñ tak aa ga.e

ho badan ke loch kā kyā bayāñ kisī nai kī mauj hai par-fishāñ
koī lai hai zer-e-qabā nihāñ koī shai ba-sūrat-e-rāz hai

agar apnī chashm-e-nam par mujhe iḳhtiyār hotā
to bhalā ye rāz-e-ulfat kabhī āshkār hotā

ḳhaak ke putle ne āḳhir kar diyā ifshā use
dafan thā jo raaz ab tak sīna-e-mahtāb meñ

lāvaToñ se raqīboñ ne jab bhī bahlāyā
mohabbatoñ ke sabhī raaz faash karte rahe

dil-e-dard-mañd ko aaj bhī hai 'mujīb' hasrat-e-rāz-dāñ
maiñ vo ek naġhma-e-ārzū ki ḳhud apne lab pe harām huuñ

vo to log banā dete haiñ pur-asrār fazā ko
aksar koī raaz nahīñ hotā rāzoñ ke pīchhe