Tags-Raaz

dil kī anjuman se yuuñ jā rahā hai zabt-e-ġham
jaise raaz kholne koī rāz-dāñ chale

ik aise raaz kī mānind jī rahā huuñ 'shakīl'
ki jis kā mere sivā koī rāz-dāñ bhī nahīñ

khultā kahāñ ye raaz bhalā us hujūm meñ
lekin maiñ us ko dekh ke tasvīr ban gayā

shauq se rāh-e-mohabbat kī musībat jhel le
ik ḳhushī kā raaz pinhāñ jāda-e-manzil meñ hai

kānoñ kī kachchī niklī vo dīvār gaañv kī
tash.hīr kar rahī hai faqīroñ ke raaz kī

raaz ulfat ke ayaañ raat ko saare hote
ham ka.ī baar unheñ ghabrā ke pukāre hote

dil-e-vahshī kā afsāna kahegā tum bhī sun lenā
junūñ ke raaz dīvāna kahegā tum bhī sun lenā

ab koī kyā kare jo ba-sad sa.ī-e-zabt-e-rāz
aa jaa.e lab pe naam tumhārā kabhī kabhī

kaunain ke har raaz ko mahram jise kahiye
'manshā' ko vahī fikr-e-rasā tujh se milī hai

fareb-e-sāda-dilī dekh us sitamgar ne
bayān raaz kiyā rāz-dāñ ke baare meñ

kyā chhupe raaz ilāhī dil-e-shaidā.ī kā
arsa-e-hashr to bāzār hai rusvā.ī kā

tirī ḳhamoshī meñ muzmar hai merā rāz-e-suḳhan
ki be-zabān na kar de tirī sadā mujh ko

badnām kiyā hai tan-e-anvar kī safā ne
dil meñ bhī use raaz chhupānā nahīñ miltā

raat bhar chāñd se hotī raheñ terī bāteñ
raat khole haiñ sitāroñ ne tire raaz bahut

aañkh band hote hī mujh par khul gayā rāz-e-hayāt
ziist ko duniyā meñ umr-e-jāvedāñ samjhā thā maiñ

ban ke rāz-e-zindagī dil meñ rahe
zindagī meñ phir bhī tarsāyā bahut

manziloñ ke ba.ad dil us raaz kā mahram huā
dar-haqīqat vo ḳhushī thī naam jis kā ġham huā

hamdard nahīñ hamrāz nahīñ kis se kahiye kyuuñ kar kahiye
jo dil pe guzartī rahtī hai jo jaan pe sadme sahte haiñ

aisā nahīñ ki un se mohabbat nahīñ mujhe
ifshā-e-rāz-e-ishq kī jur.at nahīñ mujhe