Tags-Rang

sar-e-shām duur fazāoñ meñ ye jo aa.ine se chamak uThe
yahī Dhaltī dhuup ke rañg the ki jo tā.eroñ ke paroñ meñ the

shām-e-vidā.a thī magar us rañg-bāz ne
paañv pe hoñT rakh diye jaane nahīñ diyā

simTā tirā ḳhayāl to gul-rañg ashk thā
phailā to misl-e-dasht-e-vafā phailtā gayā

umr-bhar ḳhuun se likkhā hai jis afsāne ko
kitnā kam rañg hai us shoḳh ke nazrāne ko

ek ek kiran meñ tire sau rañg nazar aa.e
jab pichhle pahar chāñd ke hamrāh chalā huuñ

aaj mehñdī lagā.e baiThe haiñ
ḳhuub vo rañg laa.e baiThe haiñ

āḳhir uuprī hamdardī ko rañg to ik din laanā thā
baat thī pahle chand gharoñ tak ab duniyā bhauñchāl meñ hai

fazā hī saarī huī surḳh-rū to hairat kyā
ki aaj rañg-e-havā gul-ruḳhāñ se miltā hai

tasvīr-e-zindagī meñ nayā rañg bhar ga.e
vo hādse jo dil pe hamāre guzar ga.e

udaas chehre pe yuuñ chamaktī hoñ merī āñkheñ
kabhī tabassum ke naam rañg-e-gulāb likkhūñ

zindagī ghistī rahī 'shāhīñ' basar hone ke saath
pairahan kā rañg phīkā roz dhone se huā

maiñ ne dekhā hai chaman se ruḳhsat-e-gul kā samāñ
sab se pahle rañg maddham ek kone se huā

laate hī kuchh rañg-e-javānī aañkh se yuuñ kiiñ aañkh ne bāteñ
aao dikhā.eñ sab ko ghāteñ sho.abda-gar tum jādūgar ham

āshnā chehroñ se rañg-e-āshnā.ī uḌ gayā
ham-zabāñ ab ḳhushk pattoñ ke sivā miltā nahīñ

jī meñ aatā hai ki phūloñ kī uḌā duuñ ḳhushbū
rañg uḌā laa.e haiñ zālim tirī ra.anā.ī kā

dil kā thoḌā sā lahū is meñ milā kar ham ne
ashk-e-be-dard ko durdāna banā kar chhoḌā

shām-e-tanhā.ī meñ bhī ik shaḳhs kī yādoñ kā saath
rañg apne ġham ke vīrānoñ kā sañvlāne lagā

dukh uThā.e to bahut rañg ḳhud apne dekhe
kam qayāmat se na thā jo bhī thā manzar apnā

rañg terā uḌā uḌā sā hai
lag ga.ī hai tujhe nazar shāyad

shafaq ke rañg nikalne ke baad aa.ī hai
ye shaam dhuup meñ chalne ke baad aa.ī hai