Tags-Rang

rañg-e-tābīr añdheroñ se uThā letā huuñ
kaun ḳhvāboñ ko atā kartā hai bīnā.ī ki maiñ

hazār rañg jalāl-o-jamāl ke dekhe
vo ma.arke tire husn-e-ḳhayāl ke dekhe

ye rañg rañg manāzir ye rañg rañg ke log
tamām raat kisī ḳhvāb ke makān meñ the

ḳhushbū jo nahīñ hai na sahī rañg to dekho
bāloñ meñ sajā lo koī kāġhaz kā banā phuul

kuchh aise rañg bharo jo samay se utre nahīñ
ye mū-qalam se kareñ iltimās tasvīreñ

nazar meñ rañg samā.e hue usī ke haiñ
ye saare phuul ugaa.e hue usī ke haiñ

be-misālī ke haiñ ye rañg jo bā-vasf-e-hijāb
be-naqābī par tirā jalva-e-yaktā kyā ho

maiñ din meñ ḳhvāb banātā huuñ rañg rañg ke ḳhvāb
magar ye raat unheñ mismār karne aatī hai

dekho ye rañg-e-ruḳh kā shagūfa ki merā ishq
zāhir huā hai kahne se baḌh kar kahe baġhair

bahishtī baaġh kī sab titliyāñ haiñ par-burīda
shikasta rañg tā-hadd-e-nazar afsos kā hai

kabhī dhanak sī utartī thī un nigāhoñ meñ
vo shoḳh rañg bhī dhīme paḌe havāoñ meñ

agar sharar hai to bhaḌke jo phuul hai to khile
tarah tarah kī talab tere rañg-e-lab se hai

hazār shāḳheñ adā se lachkīñ huā na terā sā loch paidā
shafaq ne kitne hī rañg badle milā na rañg-e-shabāb terā

rañg us mahfil-e-tamkīñ meñ jamāyā na gayā
ḳhāmushī se bhī mirā haal sunāyā na gayā

tum rañg ho tum nuur ho tum shīsha ho tum jaam
kirnoñ se bharī sub.h ho tāroñ se bharī shaam

pairahan uḌ jā.egā rañg-e-qabā rah jā.egā
phuul ke tan par faqat aks-e-havā rah jā.egā

haañ rañg-e-bahārāñ hai magar us ke lahū se
jo dast-ba-dil mohr-ba-lab dard-ba-jāñ hai

ishq ne tere mujhe is rañg ko pahuñchā diyā
muñh se har ik ke sunā dushnām tere vāste

hai kis ke lams kī ḳhushbū guloñ meñ
dhanak meñ rañg haiñ kis kī adā ke

ham hue tasvīr ab pahlā sā vo aalam kahāñ
rañg haiñ sab pairahan meñ kho ga.e haiñ ham kahāñ