Tags-Raushni

thā safed-o-siyāh se vāqif
merī āñkhoñ meñ raushnī thī kabhī

yaaro shaguft-e-gul kī sadā par chale chalo
dasht-e-junūñ ke moḌ pe kuchh raushnī bhī hai

āsmāñ se sahīfe utarte rahe
raushnī se magar log Darte rahe

raushnī had se ziyāda na baḌhe
sāmne mere añdherā na karo

ek an-miT raushnī thā arsh kī mehrāb par
aadmī ke ruup meñ aa kar maiñ faanī ho gayā

ye shaam aur raushnī kī ye qatāreñ
udāsī aur gahrī ho ga.ī hai

zamīñ par raushnī hī raushnī hai
ḳhalā meñ ik kiran gum ho ga.ī hai

charāġh se kabhī tāroñ se raushnī māñge
añdherī raat bhī kis kis se zindagī māñge

jalāne vaale jalāte haiñ nafratoñ ke charāġh
fazā-e-vaqt mohabbat kī raushnī māñge

ek dam ho raushnī to kyā nazar aa.e 'malāl'
kyā samajh pā.ūñ jo sab kuchh nā-gahāñ mālūm ho

laveñ charāġhoñ kī āñkhoñ meñ gum huiiñ shāyad
kahīñ se raushnī laa.eñ to fikr-e-shām kareñ

na jab tak dard-e-insāñ se kisī ko āgahī hogī
na paidā ishq hogā aur na dil meñ raushnī hogī

numūd-e-zāt ko pahle hī raushnī kam thī
baḌhe jo saa.e to kuchh aur bhī malāl huā

jo dūsroñ ke ghar meñ ujālā na kar sake
maiñ aisī raushnī kā talabgār bhī nahīñ

badan par raushnī oḌhī hai sab ne
añdherā ruuh tak phailā huā hai

qismat hī meñ raushnī nahīñ thī
bādal to kabhī kā chhaT rahā thā

na ḳhizāñ meñ hai koī tīrgī na bahār meñ koī raushnī
ye nazar nazar ke charāġh haiñ kahīñ bujh ga.e kahīñ jal ga.e

jigar ke daaġh koī kam haiñ raushnī ke liye
maiñ jāgtā huuñ sitāroñ se kah do so jaa.eñ

na raushnī hai koī aur na rāste ma.alūm
chale haiñ aaj tire saath be-ḳhatar phir bhī

shafaq huuñ sūraj huuñ raushnī huuñ
salīb-e-ġham par ubhar rahā huuñ