Tags-Raushni

hamārī ġhazloñ hamāre sheroñ se tum ko ye āgahī milegī
kahāñ kahāñ kārvāñ luTe haiñ kahāñ kahāñ raushnī milegī

zinda huuñ is tarah ki ġham-e-zindagī nahīñ
jaltā huā diyā huuñ magar raushnī nahīñ

tirī nigāh ne thoḌī sī raushnī kar dī
vagarna arsa-e-kaunain meñ añdherā thā

sujhā.ī de na sakā rāsta ḳhayāloñ kā
dikhā.ī de na sakī raushnī muqābil kī

ye be-gharī ye samundar ye raushnī dil kī
akele baiTh ke sochā kiye haiñ mahfil kī

karo hamāre hī dāġhoñ se raushnī tum bhī
baḌā hai dard kā rishta duī kī bū na rahe

is dā.era-e-raushni-o-rañg se aage
kyā jāniye kis haal meñ bastī ke makīñ haiñ

log māñge ke ujāle se haiñ aise mar.ūb
raushnī apne charāġhoñ kī burī lagtī hai

raushnī vaale to duniyā dekheñ
ham añdhere ke sivā kyā dekheñ

ġham kī tārīkiyoñ meñ ai 'zaidī'
raushnī vo bhī hai jo maddham hai

ye vasl-lamhoñ kī raushnī hai jo dil kī duniyā meñ aa basī hai
mahaktī yādoñ kī chāñdnī hai maiñ jis kī kirnoñ se jal rahī huuñ

chāñd bhī hairān dariyā bhī pareshānī meñ hai
aks kis kā hai ki itnī raushnī paanī meñ hai

jo tīrgī meñ diyā ban ke raushnī baḳhshe
us e'timād kī halkī sī ek aas huuñ maiñ

aarzū hai sūraj ko aa.ina dikhāne kī
raushnī kī sohbat meñ ek din guzārā hai

shikast-e-dil meñ bhī ik zindagī nazar aa.ī
diyā bujhā to hameñ raushnī nazar aa.ī

shām-e-ġham tere tasavvur hī se āñkhoñ meñ charāġh
varna mere ghar meñ ho aur raushnī tere baġhair

huī hai qaid zamāne meñ raushnī kis se
bhalā vo jism aur us ko koī qabā lagtī

mujhe yaqīn ki mahfil kī raushnī huuñ maiñ
use ye ḳhauf ki mahfil ḳharāb kar dūñgā

ab bhī fareb detī hai āñkhoñ kī raushnī
sūrat tirī bhulā.e zamāna guzar gayā

ḳhatm ho jā.egī har raushnī duniyā kī magar
tum chamakte hī rahoge mah-e-tābāñ kī tarah