Tags-Raushni

maiñ saarī umr añdheroñ meñ kaaT saktā huuñ
mire diyoñ ko magar raushnī parā.ī na de

ravāñ-davāñ hai zindagī charāġh ke baġhair bhī
hai mere ghar meñ raushnī charāġh ke baġhair bhī

vo shab thī ki thī raushnī jis meñ din kī
zamīñ par se ik nuur tā āsmāñ thā

inhī ġham kī ghaTāoñ se ḳhushī kā chāñd niklegā
añdherī raat ke parde meñ din kī raushnī bhī hai

vo raushnī meñ nahāyā huā tasavvur thā
añdherā baḌhtā gayā dast-e-shab nikal aa.e

guzar to saktī haiñ rāteñ jalā jalā ke charāġh
magar ye kyā ki añdhere ko raushnī samjho

nazar bujhī to mile raushnī kahāñ 'hashamī'
jalā ke sham.a bahut aañkh se lagā.ī bhī

maiñ shab nizhādoñ meñ sub.h-e-fardā kī aarzū huuñ
maiñ apne imkāñ meñ raushnī huuñ sabā nahīñ huuñ

havāoñ kī dastaras meñ kab huuñ jo bujh rahūñgā
maiñ isti.āra huuñ raushnī kā diyā nahīñ huuñ

ik āvāz ubhartī aa rahī hai
dūdhiyā sī raushnī ik

kahīñ bhī jā-e-amāñ nahīñ hai
na raushnī meñ na tīrgī meñ

marhale tārīk the aur manzileñ tārīk tar
us kī nannhī raushnī paiham rahī zulmat-shikan

kā.enāt-e-shab meñ chashm-e-justujū bhaTkī phirī
raushnī ke mantaqe āḳhir nazar aane lage

yaad un kī dil meñ aa.ī vo āsūdgī liye
zulmat meñ aa.e jaise koī raushnī liye

baḌhī hai raushnī tahzīb-e-nau kī
makāñ be-nūr hote jā rahe haiñ

dasht-e-vahshat meñ jalā kar zulmatoñ kī bastiyāñ
raushnī kī samt merā kārvāñ baḌhtā gayā

idhar se na jaao
idhar raushnī hai

tum rañg ho tum nuur ho tum shīsha ho tum jaam
kirnoñ se bharī sub.h ho tāroñ se bharī shaam

hameñ ḳhabar hai ki apne ghar ke charāġh koī ghaḌī haiñ lekin
hameñ yaqīñ hai ki raushnī kī naved sunñe talak jaleñge

dushmanī vo laa.e haiñ dostī ke dāman meñ
tīrgī hai poshīda raushnī ke dāman meñ