Tags-Sabr

munāsib nahīñ hāl-e-āshiq se sabr
rakhe hai ye daarū zarar kī taraf

sukūt us kā hai sabr-e-jamīl kī sūrat
maiñ jis ke lab pe thā sahar-e-tavīl kī sūrat

manzūr imtihān-e-dil-e-ishq-bāz hai
ab apne vāste bhī to sabr-āzmā haiñ ham

khā.egā shikast ik din sabr-o-zabt-e-paiham se
dard kā tasalsul aur jabr kā haTīlā-pan

tujh se har baar mil ke maiñ be-sabr
na malūñ phir ye Thaan rakhtā huuñ

sabr chhuT dil sab aur bātoñ maiñ
qābil-e-imtihān rakhtā huuñ

merī sī tarah ishq se hotā kabhī betāb
e.ajāz-numā sabr kā ayyūb na hotā

chheḌ se ab vo ye kahte haiñ ki sambhlo 'hasrat'
sabr o tāb-e-dil-e-bīmār ko ġhārat kar ke

kahtā huuñ ki aa hī jā.egā sabr
ye fikr bhī hai agar na aayā

kyā kareñ dil nahīñ hai paas 'razā'
sabr meñ varna be-jigar haiñ ham

dil gayā diin gayā sabr gayā taab ga.ī
yuuñ hī apne to hue saikḌoñ nuqsāñ tujh bin

kisī pe karnā nahīñ e'tibār merī tarah
luTā ke baiThoge sabr o qarār merī tarah

sabr bhī jis ke nishāne pe hai aur siina bhī
hausla kitnā hai us tiir meñ dekhā jaa.e

huā ba.ad-e-vasl ajab mazā ki ḳhamosh baiThe judā judā
hama-tan maiñ sabr-o-sukūñ huā hama-tan vo sharm-o-hayā hue

ḳhatm ho jañg ḳharābe pe hukūmat kī jaa.e
āḳhirī māraka-e-sabr hai ujlat kī jaa.e

jabr se ek huā zā.eqa-e-hijr-o-visāl
ab kahāñ se vo mazā sabr ke phal meñ aa.e

sabr karnā furqat-e-mahbūb meñ samjhe the sahl
khul gayā apnī samajh kā haal jab karnā paḌā

hādse se hī huā ġham kā mudāvā mere
falsafa sabr kā logoñ ko paḌhāne baiThā

mausam-e-nā-rasā.ī aayā hai
sabr kī fasl ab ugāte haiñ

sab dilāse us ke jhūTe us ke sab vaade fareb
kab tak āḳhir ham raheñ sabr-o-razā oḌhe hue