Tags-Sabr

peT pe bāñdhā gayā sabr kā bhārī patthar
aur guzārā gayā har lamha mashaqqat se yahāñ

jaan hī jā.egī yā sabr hī aa jā.egā
yā hameñ aaj nahīñ yā dil-e-nāshād nahīñ

haath phailāyā na jā.egā bharī mahfil meñ aaj
sabr kī daulat ko saaqī rā.egāñ kyuuñ kar kareñ

ab mujhe sabr aa gayā hai dost
ab tū chāhe kabhī na vāpas aa

sabr kī had bhī to kuchh hotī hai
kitnā palkoñ pe sambhālūñ paanī

maanā burī ḳhabar hai pa terī ḳhabar to hai
sabr-o-qarār nazr karūñ nāma-bar ko maiñ

'dāġh' tū dekh to kyā hotā hai
jabr par sabr kiyā karte haiñ

terī duniyā bhī mirī tarah ujaḌ jā.egī
rah gayā mujh meñ agar sabr kā mādda aadhā

sabr kī had bhī to kuchh hotī hai
kitnā palkoñ pe sambhālūñ paanī

ham zarā aur sabr kar lete
dard shāyad davā hī ban jaatā

sabr kī shāḳh meñ lagtā hai vo mīThā meva
sab se duniyā meñ alag jis kā mazā hotā hai

na us ko sabr na tāsīr kā patā yā rab
jalā diyā hai mujhe ḳhaak meñ ye aah mile

mire sabr-o-tāb ke sāmne na hujūm-e-ḳhauf-o-rajā rahā
vo chamak ke barq rah ga.ī vo garaj ke abr guzar gayā

talḳhī-e-sabr ḳhush-gavār huī
zahr ne bhī mujhe asar na kiyā

aahoñ kī tāmīreñ kī thiiñ sabr ke baaġh lagā.e the
shahr-e-vafā meñ mehnat-e-jāñ kī roz na.ī mazdūrī thī

ham haiñ aur zabt-e-fuġhāñ hai āj-kal
sabr kā phir imtihāñ hai āj-kal

sab sabr-o-shakeb-o-hosh kho detā huuñ
kartā huuñ kisī ko yaad ro detā huuñ

dāmān-e-sabr hijr meñ go tār-tār hai
va.ade kā un ke phir bhī hameñ e.atibār hai

kyā ifshā na rāz-e-ġham kisī par jīte-jī 'fāriġh'
baḌe sabr-o-tahammul se basar kī zindagī maiñ ne

baḌī sabr-kash thiiñ masāfateñ ki qadam qadam thiiñ qayāmateñ
mirī himmateñ to nihāl thiiñ mire hausle to bahāl the