Tags-Sabr

sabr-o-hosh-o-ḳhirad ga.e dil se
merī āñkhoñ ke ghar luTā aage

na intizār ke ma.anī na sabr ke paimāñ
kisī dishā meñ ufaq bhī nazar nahīñ aatā

vo mujh ko chhoḌ ke jis aadmī ke paas gayā
barābarī kā bhī hotā to sabr aa jaatā

jaate haiñ sabr o qarār o ḳhirad o hosh o havās
jaras-e-qāfila apnā dil-e-nālāñ hogā

haañ ḳhudā maġhfirat kare us ko
sabr marhūm thā ajab koī

ḳhuuñ meñ tar sabr kī chādar kahāñ le jāoge
zindagānī ko barahna-sar kahāñ le jāoge

bil-ehtimām zulm kī tajdīd kī ga.ī
aur ham ko sabr-o-zabt kī tākīd kī ga.ī

kuchh to ham sabr o razā bhuul ga.e haiñ shāyad
aur kuchh zulm bhī sayyād bahut kartā hai

dāman-e-sabr na chhoḌeñge kabhī ahl-e-vafā
tum banāoge mirī jaan bahāne kitne

chalte haiñ ki ab sabr bhī itnā nahīñ rakhte
ik aur na.e dukh kā irāda nahīñ rakhte

us ne kahā hai sabr paḌegā raqīb kā
le aur be-qarār huā be-qarār dil

dāman-e-sabr ke har taar se uThtā hai dhuāñ
aur har zaḳhm pe hañgāma uThā aaj bhī hai

jo charāġh-e-ashk nasīb the vahī sabr kar ke jalā diye
vahī kāfirāna siyāhiyāñ ye vahī bujhī huī shaam hai

zabāñ-darāzoñ se 'nusrat' kahāñ talak laḌtī
so dil pe sabr kī rakh kar chaTān baiTh ga.ī

hisār-e-sabr se jis roz maiñ bāhar nikal aatā
samundar ḳhud mirī ā.ankhoñ kī vīrānī meñ aa jaate

agar ho sabr-o-qanā.at kī daulat ai 'parvīñ'
gadā bhī karte haiñ vo hī jo shaah karte haiñ

bhaḌak uTTheñge sho.ale ek din duniyā kī mahfil meñ
kahāñ tak jazb hoñgī bijliyāñ sabr-āzmā dil meñ

mire miTne pe gar tū bhī miTā hotā to kyā hotā
tujhe bhī sabr ai dil aa gayā hotā to kyā hotā

zabt bhī kab tak ho saktā hai sabr kī bhī ik had hotī hai
pal bhar chain na paane vaalā kab tak apnā rog chhupā.e

marg-e-yārān-e-suḳhan-sanj pe ḳhuuñ rotā huuñ
kyā karūñ sabr ki ab sabr kā yaarā kam hai