Tags-Sahil

maiñ ne ek sāhil se ek siipī uThā.ī
aur apne aañsū ko us meñ band kar ke

ab vo piirī meñ kahāñ ahd-e-javānī kī umañg
rañg maujoñ kā badal jāatā hai sāhil ke qarīb

ahl-e-havas kī kashtī yak baam o do havā hai
dariyā-e-ishq meñ bhī sāhil ko DhūñDte haiñ

ik lahr meñ na the ham kyuuñ ai habāb dekhā
yuuñ aañkh band kar ke sāhil ko DhūñDte haiñ

ye subuk-sārān-e-sāhil kis qadar haiñ mutma.in
in ke aage bhī koī mañjhdār honā chāhiye

na kar talāsh ki sāhil nahīñ mirā maskan
maiñ har ghaḌī tirī kashtī ke bādbān meñ huuñ

ai asīr-e-ġham sāhil idhar aa
beach dhāre se pukārā dariyā

girdāb mahv-e-raqs hai tūfān mahv-e-josh
kuchh log shauq-e-mauj meñ sāhil se aa.e haiñ

sāgar meñ nahīñ thī mauj ik bhī
sāhil thā ki phir bhī kaT rahā thā

duur nazroñ se hai sāhil-e-mudda.ā
kashtī-e-jāñ ko sail-e-tabāhī na de

dekhiye un bad-nasīboñ kā ma.aal
vo jo Duube aa ke sāhil ke qarīb

be-hisī insān kā hāsil na ho
dostī ho ret kā sāhil na ho

jo ho sake to ab ke bhī sāgar ko lauT aa
sāhil ke siip svاatī kī būñdoñ se bhar ga.e

parvarda-e-sāhil kyā jaane āsūda-e-manzil kyā samjhe
jo duur haiñ sāhil-o-manzil se un kī kyā hālat hotī hai

kabhī tū apne ḳhazīne uchhāl sāhil par
kisī sadaf meñ ye dekheñ guhar bhī hai ki nahīñ

jā lagegā safīna sāhil se
nā-ḳhudā laakh apne saat nahīñ

har mauj-e-balā ik sāhil hai girdāb hī apnā hāsil hai
ye kashti-e-dil vo qātil hai mañjhdār nahīñ to kuchh bhī nahīñ

kashtī shikastgān-e-yam-e-iztirāb ko
terā hī ek naam hai sāhil kaheñ jise

DhūñD siipī kī tarah dil ko na sāhil ke qarīb
ye sadaf duur bahut duur tah-e-āb girā