Tags-Sahil

to kyuuñ ye sāhil kī dhuup mere niDhāl qadmoñ se aa lagī hai
mujhe kināre lagā diyā hai agar kisī shaḳhs kī duā ne

maujoñ pe e'timād na kyuuñ kar kare koī
sāhil to e'tibār ke qābil nahīñ rahā

abhī ham nāqidāna fāsle se
ajnabī sāhil ke tevar dekhte haiñ

hai azm-e-javāñ sab kuchh tūfān-e-havādis meñ
sāhil kā bharosa kiyā ye jāatā hai sāhil tak

banāo ghar na miTTī ke lab-e-sāhil ai nādānoñ
samundar to kināroñ se vafādārī nahīñ rakhte

sāhil se biich samundar gahrā paanī
ghar miTTī ghar se bāhar gahrā paanī

hāroge jo himmat to Dubo degā samundar
sāhil tumheñ kashtī se utar kar na milegā

dard-o-ġham se jo tapāñ thā vo milā dil mujh ko
is liye dafn kiyā hai lab-e-sāhil mujh ko

mar gayā ashk jo āñkhoñ se bahe aah ke saath
aa ga.ī niiñd havā meñ lab-e-sāhil mujh ko

haath aa.egā kyā sāhil-e-lab se hameñ 'anjum'
jab dil kā samundar hī guhar-bār nahīñ hai

jazba-e-dil ko ba-andāz-e-digar maiñ ne 'hayāt'
kabhī kashtī kabhī tūfāñ kabhī sāhil bāñdhā

koī dekhe to sahī hausla-mandī apnī
ham ne tūfān kī har ik mauj ko sāhil bāñdhā

sāhil kī ret ne hameñ vāpas bulā liyā
varna zarūr halqa-e-girdāb dekhte

tamām nāḳhudā sāhil se duur ho jaa.eñ
samundaroñ se akele meñ baat karnī hai

qatre se ek mauj ye kahtī nikal ga.ī
sāhil se maslahat hai kinārā kabhī kabhī

maiñ talātum meñ bhī sāhil kī ḳhabar rakhtā huuñ
maiñ ne har mauj ko sāhil se milā rakkhā hai

samundar kī hadeñ baḌhne lagī haiñ
nazar aatā kahīñ sāhil nahīñ ab

Dūbne ke liye sāhil pe khaḌā huuñ maiñ bhī
bandisheñ toḌ ke dhāre bhī nahīñ nikleñge

bahr-e-hastī sā koī dariyā-e-be-pāyāñ nahīñ
āsmān-e-nīl-gūñ sā sabza-e-sāhil kahāñ

phir bhī vahī sailāb-e-havādis jaane do ai sāhil vaalo
yā is baar safīna Duubā yā us ke mañjdhār nahīñ hai